Të paktën 56 persona kanë vdekur në shtetin verilindor të Brazilit, Pernambuco, mes shirave të dendur gjatë fundjavës, sipas forcave të mbrojtjes civile të shtetit.
56 persona të tjerë janë të zhdukur dhe të paktën 25 janë plagosur, tha të dielën Ministri i Zhvillimit Rajonal i Brazilit, Daniel Ferreira.
Më shumë se 3,900 njerëz kanë humbur gjithashtu shtëpitë e tyre për shkak të rrebeshit shkatërrues, shtoi Ferreira.
Disa nga vdekjet u shkaktuan nga rrëshqitjet e dheut në zonën më të madhe të Recife, tha mbrojtja civile e Pernambuco, e cila u ka kërkuar banorëve që jetojnë në zona me rrezik të lartë të kërkojnë strehim diku tjetër.
Në vetë qytetin e Recife, shkollat janë hapur për të strehuar familjet e zhvendosura. Presidenti brazilian Jair Bolsonaro tha se ushtria braziliane do ndihmonte të prekurit dhe se ai personalisht do udhëtonte në Recife të hënën për të vlerësuar situatën.
“Qeveria jonë vuri në dispozicion, që në momentin e parë, të gjitha mjetet e saj për të ndihmuar të prekurit, përfshirë Forcat e Armatosura.” – shkroi ai në Tëitter të dielën.
Verilindja e Brazilit ka vuajtur nga vëllime jashtëzakonisht të larta të shiut, thonë zyrtarët. Disa zona kanë regjistruar më shumë reshje shiu në 24 orët e fundit sesa vëllimi i përgjithshëm i parashikuar për muajin maj.
