Një thatësirë e madhe ka bërë që 24 nga 96 departamentet e Francës të vendosin kufizime në përdorimin e ujit. Lajmi u konfirmua të shtunën nga Ministria e Tranzicionit Ekologjik të vendit.
Kufizimet variojnë nga thirrjet e thjeshta për të kursyer ujin në disa zona deri në një reduktim në më shumë se 50% në tërheqjet bujqësore dhe ndalimet për larjen e makinave, ujitjen e kopshteve dhe mbushjen e pishinave.
Kështu tha ministria për gazetën “Le Figaro”.
Nivelet e reshjeve kanë qenë shumë nën normale në Francë që nga shtatori i vitit 2021, dhe muajin e kaluar deficiti arriti në 25%. Situata u përkeqësua nga temperaturat anormale të nxehta në maj.
Që nga mesi i prillit, tetë departamente franceze u detyruan të vendosin kufizime në përdorimin e ujit, krahasuar me vetëm tre në të njëjtën periudhë të vitit 2021.
“Këtë vit, thatësira kishte filluar herët.”– tha kryeministrja e re e Francës Elisabeth Borne në fillim të kësaj jave. “Ne po marrim hapa për të menaxhuar burimet ujore dhe për të parandaluar që situata të jetë e pamenaxhueshme këtë verë”.
Autoritetet lokale janë udhëzuar “të ruajnë sa më shumë burimet ujore”, tha Borne, duke u bërë thirrje gjithashtu “të gjithë francezëve të reduktojnë konsumin e ujit”.
Kryeministrja njoftoi gjithashtu se 400 milionë euro do të ndahen për të mbështetur fermerët, të cilëve mund t’u mungojë ushqimi për bagëtinë për shkak të thatësirës.
