Ministri gjerman i Ekonomisë, Robert Habeck, shprehu të dielën frikën se uniteti i Bashkimit Evropian po ‘fillon të shkërmoqet’ përpara një samiti për të diskutuar një embargo të naftës kundër Rusisë dhe planet për të shkurtuar varësinë nga energjia ruse.
Udhëheqësit e BE-së do takohen të hënën dhe të martën për të diskutuar një paketë të re sanksionesh kundër Rusisë, e cila mund të përfshijë gjithashtu një embargo të naftës dhe një program që synon të përshpejtojë përfundimin e varësisë nga karburantet fosile, përfshirë gazin rus.
“Pas sulmit të Rusisë ndaj Ukrainës, ne pamë se çfarë mund të ndodhë kur Evropa qëndron e bashkuar. Me synimin për samitin nesër, le të shpresojmë që të vazhdojë kështu. Por tashmë ka filluar të shkërmoqet dhe të shembet përsëri.” – tha Habeck në një konferencë shtypi.
Të premten, vendet evropiane u përpoqën të arrinin një marrëveshje për embargon e dërgesave detare të naftës ruse, por lejuan dërgesat me tubacion, një kompromis për të fituar Hungarinë dhe për të zhbllokuar sanksionet e reja kundër Moskës.
Habeck bëri thirrje që Gjermania të flasë me një zë në samit në vend që të abstenojë nga votat për shkak të dallimeve të opinioneve brenda koalicionit qeverisës të vendit. Ai bëri thirrje për unitet të ngjashëm nga shtetet e tjera të BE-së.
“Evropa është ende një zonë e madhe ekonomike me fuqi të jashtëzakonshme ekonomike. Dhe kur ajo qëndron e bashkuar, mund ta përdorë atë fuqi.” – tha Habeck në hapjen e panairit gjerman ‘Hannover Messe’.
