Makinat elektronike të votimit të përdorura në të paktën 16 shtete kanë të meta sigurie që mund të shfrytëzohen nga hakerat, tha një mbikëqyrës kibernetik i qeverisë, duke ngritur pyetje të reja në lidhje me softuerin pas akuzave për mashtrim dhe manipulim të gjerë në garën presidenciale të 2020-ës.
Një raport nga Agjencia Amerikane e Sigurisë Kibernetike dhe Infrastrukturës (CISA) i marrë nga Associated Press identifikoi nëntë boshllëqe kryesore në makinat e prodhuara nga Dominion Voting Systems, duke thënë se ato mund të jenë të prekshme ndaj hakimeve.
CISA pohoi se nuk kishte prova që të metat e sigurisë ishin përdorur ndonjëherë për të ndikuar në rezultatet e zgjedhjeve dhe drejtori ekzekutiv i agjencisë, Brandon Wales, i tha AP se ‘procedurat standarde të sigurisë zgjedhore të shteteve do zbulonin shfrytëzimin e këtyre dobësive dhe në shumë raste do parandalonin përpjekjet tërësisht’.
Duke iu drejtuar zyrtarëve të zgjedhjeve shtetërore, raporti megjithatë sugjeroi se është bërë shumë pak për të mbyllur dobësitë, duke kërkuar ‘masa mbrojtëse për të zvogëluar rrezikun e shfrytëzimit’ përpara çdo zgjedhjeje. Ai vuri në dukje se disa shtete që përdorin makinat kanë qenë të dobëta në lidhje me sigurinë e makinerive.
Ndërsa Dominion u përfshi thellë në polemikën zgjedhore të vitit 2020, gjatë së cilës ish-presidenti Donald Trump dhe aleatët e tij pretendonin vazhdimisht se makinat e firmës ishin manipuluar për të ndikuar nw rezultatin e zgjedhjeve, kompania ka mohuar me zë të lartë se sistemet e saj janë përdorur në mënyrë të paligjshme.
Ajo ka nisur një sërë padish për shpifje kundër atyre që pretendojnë të kundërtën, duke përfshirë ish-avokatët e Trump, Rudy Giuliani dhe Sidney Powell, disa prej tyre së bashku me firmën tjetër të makinerive të votimit Smartmatic.
Shumica e zyrtarëve të zgjedhjeve shtetërore dhe federale kwmbwngulwn gjithashtu se në vitin 2020 nuk u bë asnjë mashtrim i përhapur dhe një numër çështjesh ligjore që pretendojnë shkelje janë hedhur poshtë ose janë tërhequr.
Në përpjekjet për ‘kontrollin e thashethemeve’, CISA ka theksuar më parë se ‘ekzistenca e një cenueshmërie në teknologjinë zgjedhore nuk është dëshmi se dobësia është shfrytëzuar’, duke vënë në dukje se të gjitha sistemet dixhitale përmbajnë disa të meta sigurie.
“Dobësitë e identifikuara duhet të merren seriozisht dhe masat duhet të zbatohen në kohën e duhur.” – tha ai, por shtoi se ‘është e rëndësishme të theksohet se nuk ka asnjë tregues që dobësitë kibernetike kanë ndihmuar në fshirjen, humbjen ose ndryshimin e votave nga ndonjë sistem votimi’.
Makinat e votimit të prekura Dominion përdoren nga të paktën disa votues në të paktën 16 shtete, në shumicën e rasteve për ata që fizikisht nuk janë në gjendje të plotësojnë një fletëvotim në letër me dorë. Në disa shtete si Georgia pothuajse i gjithë votimi personal bëhet në pajisje, sipas AP.
