Një person i armatosur vrau katër punonjës në një ndërtesë spitali në Tulsa, Oklahoma të mërkurën përpara se të vetëvritej, tha policia. Tragjedia ndodhi vetëm disa javë pas të shtënave masive vdekjeprurëse në Teksas dhe Nju Jork.
Policia tha se vrasësi, i armatosur me një pushkë dhe një pistoletë, hapi zjarr në katin e dytë të ndërtesës Natalie në spitalin Saint Francis, duke vrarë katër persona.
Sistemi Shëndetësor i Shën Françeskut, i cili drejton klinikën, konfirmoi vdekjen e katër prej punonjësve të saj.
Zëvendësshefi i Departamentit të Policisë së Tulsa, Eric Dalgleish u tha gazetarëve se oficerët u lajmëruan për një person që kishte nisur të qëllonte me armë rreth orës 17:00 dhe mbërritën në vendngjarje brenda katër minutave. Ai tha se sulmuesi u vetëvra. Deri më tani nuk janë dhënë hollësi për identitetin e të dyshuarit.
Kapiteni i Departamentit të Policisë në Tulsa, Richard Meulenberg më vonë i tha CNN se disa njerëz u plagosën nga të shtënat me armë zjarri.
“Ajo që ndodhi sot në Tulsa është një akt i pakuptimtë dhune dhe urrejtjeje.” – tha guvernatori Kevin Stitt, duke ofruar ngushëllime për familjet e viktimave dhe duke falënderuar policinë e Tulsa për veprimet e tyre.
Shtëpia e Bardhë lëshoi një deklaratë të shkurtër duke thënë se presidenti Joe Biden është informuar për tragjedinë.
Të shtënat në Tulsa ndodhën vetëm tetë ditë pasi një person i armatosur 18-vjeçar vrau 19 nxënës dhe dy mësues në shkollën fillore Robb në Uvalde, Teksas. Sulmuesi u vra nga forcat e rendit.
Më 14 maj, një tjetër person i armatosur 18-vjeçar hyri në një dyqan ushqimesh në Buffalo, Nju Jork, duke vrarë 10 persona. I dyshuari, i cili thuhet se shkroi një manifest në mbështetje të racizmit dhe pikëpamjeve neo-naziste, u arrestua.
