Biznesmeni Dmitry Kovtun, një nga dy rusët e akuzuar nga Mbretëria e Bashkuar për helmimin e ish-oficerit të KGB-së, Alexander Litvinenko në Londër në vitin 2006, vdiq të shtunën.
Vdekja e Kovtun u njoftua në rrjetet sociale nga miku i tij i ngushtë Andrey Lugovoy, një deputet rus gjithashtu i kërkuar nga Londra për çështjen Litvinenko. Ai tha se Kovtun ndërroi jetë nga ndërlikimet e Covid-19.
Autoritetet britanike akuzuan Kovtun dhe Lugovoy për vrasjen e Litvinenkos dhe kërkuan ekstradimin e tyre, gjë që u kundërshtua nga Rusia.
Të dy burrat u takuan me Litvinenkon disa herë në javët para vdekjes së tij, e cila u përcaktua se ishte nga helmimi nga elementi radioaktiv polonium.
Kovtun dhe Lugovoy mohuan të kishin të bënin me ngjarjen. Në vitin 2021, Gjykata Evropiane e të Drejtave të Njeriut vendosi se dyshja vranë Litvinenkon ndërsa vepronin si ‘agjentë’ të Rusisë. Kremlini argumentoi se vendimi ishte i pabazë dhe i motivuar politikisht.
Pas rënies së Bashkimit Sovjetik, Litvinenko vazhdoi të punonte në Shërbimin Federal të Sigurisë të Rusisë, agjencia pasardhëse e KGB-së. Ai u arratis në Britani në vitin 2000 pasi kundër tij filluan një sërë hetimesh penale.
Ai u bë kritik ndaj qeverisë ruse dhe ishte bashkëautor i një libri në të cilin pretendonte se shpërthimet me bomba në apartamente të vitit 1999 në Rusi ishin një punë e brendshme.
