Nëse konflikti ushtarak në Ukrainë nuk përfundon së shpejti, zia e bukës mund të shkaktojë paqëndrueshmëri politike në Afrikë, paralajmëroi ministri i Jashtëm italian Luigi di Maio gjatë një konference për shtyp të shtunën. Ai sugjeroi gjithashtu se ‘përhapja e organizatave terroriste dhe grushtet e shtetit’ mund të jetë në horizont.
“Lufta Botërore për bukë tashmë është duke u zhvilluar dhe ne duhet ta ndalojmë atë.” – tha ai.
Di Maio i kërkoi presidentit rus Putin që të ‘vijë në tryezë’ dhe të arrijë një marrëveshje paqeje sa më shpejt të jetë e mundur, duke përfshirë një marrëveshje specifike për grurin.
“Nuk duhet të harrojmë se ka 30 milionë tonë drithë të bllokuar në portet e Ukrainës nga luftanijet ruse. Ajo që ne po bëjmë është të sigurojmë që Rusia të zhbllokojë eksportin e grurit në portet e Ukrainës, sepse në këtë moment rrezikojmë të shpërthejnë luftëra të reja në Afrikë.”
Kryeministri italian Draghi i ka kërkuar më parë Putinit që të lejojë eksportet e grurit si nga Rusia ashtu edhe nga ato pjesë të Ukrainës nën kontrollin rus. Të premten, ky i fundit i tha TV rus se dërgesat mund të kryheshin nëpërmjet Bjellorusisë.
“Nëse dikush dëshiron të zgjidhë problemin e eksportit të grurit ukrainas, ju lutem, mënyra më e lehtë është përmes Bjellorusisë. Askush nuk po e ndalon atë. Por për këtë ju duhet të hiqni sanksionet ndaj Bjellorusisë” – shpjegoi Putin.
Ai gjithashtu ka mohuar se gruri i Ukrainës është i bllokuar nga luftanijet ruse. Putin këmbënguli se Kievi ka minuar gjerësisht portet e veta, duke krijuar rrezik serioz për anijet që kërkojnë të hyjnë në portet e Ukrainës.
Italia tha javën e kaluar se do të ndihmojë në çminimin e objekteve në mënyrë që të krijohen korridore detare për transportin e grurit, përveç korridorit ekzistues detar humanitar të hapur në jugperëndim të ujërave territoriale të Ukrainës nga Moska muajin e kaluar.
Ndërkohë, Kievi ka dërguar drithin e tij përmes portit rumun të Konstancës dhe përmes tokës në Evropë, një rrugë shumë më pak efikase, pasi mund të transportohet shumë më pak në të njëjtën kohë.
Me vendet evropiane në gjendje të paguajnë më shumë për të korrat, sasi më të vogla ka të ngjarë të shkojnë në Afrikën veriore dhe udhëheqësit nga kontinenti i janë lutur Evropës që të heqë sanksionet ndaj Rusisë, gjë që e bën më të vështirë për ta blerjen e ushqimit nëpërmjet sistemit SWIFT.
Di Maio i ka bërë thirrje Putinit që të nënshkruajë një marrëveshje armëpushimi që lejon Italinë të evakuojë civilët në Ukrainën lindore, megjithëse nuk është e qartë nëse kjo është si shtesë e korridoreve ekzistuese humanitare të krijuara nga Rusia dhe Republika Popullore e Donetskut.
Ai shtoi se Italia do të takohet të martën me vendet e tjera të Mesdheut si dhe Gjermaninë, për të ‘arritur qëllimin për të zhbllokuar sasitë e grurit që duhet të largohen nga Ukraina në një moment historik teksa familjet nuk mund të përballojnë rritjen e kostos së energjisë.
Ukraina prodhon 15% të misrit dhe gjysmën e vajit të lulediellit në tregun botëror të eksportit dhe gati 10% të eksporteve globale të grurit, duke e bërë atë një lidhje kryesore në zinxhirin global ushqimor.
