Reperi Kleviol Ahmeti i njohur me emrin e artit si “Cllevio” është arrestuar nga policia një ditë pas sherrit me reperin tjetër Rigels Rajku, të njohur si Noizy.
Sherri që kishte nisur në rrjetet sociale u përshkallëzua deri në dhunë fizike dhe videoja nga momenti i grushtimeve dhe shqelmave është bërë viral në rrjet.
Kujtojmë që tashmë ndaj Noizyt dhe babait i tij ka nisur një procedim penal nga policia në gjendje të lirë.
Sherri mes reperëve ka shërbyer si indicie për uniformat blu të cilat janë vënë në lëvizje për arrestimin e Cllevios, pasi ky i fundit në momentin e ngjarjes duhet të ishte në “arrest shtëpie”.
Kjo sepse më parë kishte qenë i arrestuar për veprat penale “Prodhimi dhe shitja e narkotikëve” dhe “Mbajtja pa leje e armëve të ftohta”. Por gjykata kishte vendosur ta linte në “arrest shtëpie”.
Njoftimi i Policisë:
Theu masën e sigurisë “Arrest në shtëpi”, arrestohet në flagrancë 36-vjeçari me precedent të mëparshëm penal.
Specialistët për Hetimin e Krimeve në Komisariatin e Policisë Lushnjë, pas informacioneve të marra në rrugë policore se shtetasi K. A. kishte thyer masën e sigurisë “Arrest në shtëpi”, duke dalë jashtë banesës, kanë organizuar punën për kapjen e tij. Pas kontrolleve nga Policia, shtetasi K. A. është lokalizuar në lagjen “Çlirimi”, në qytetin e Lushnjës.
Në vijim të veprimeve u bë arrestimi, për veprën penale “Largim i të burgosurit nga vendi i qëndrimit”, i shtetasit K. A., 36 vjeç, banues në lagjen “Loni Dhamo”, Lushnjë, i cili ishte me masë sigurie “Arrest në shtëpi”, për veprat penale “Prodhimi dhe shitja e narkotikëve” dhe “Mbajtja pa leje e armëve të ftohta”.
Në 19.03.2021, shtetasi K. A. është arrestuar në flagrancë nga Policia, pasi në automjetin që e drejtonte pa leje drejtimi, iu gjetën doza me lëndë narkotike cannabis sativa dhe 3 armë të ftohta (thika), të cilat u sekuestruan në cilësinë e provës materiale.
Shtetasi K. A. ka qenë i dënuar dhe më parë për veprimtari kriminale në fushën e narkotikëve, mbajtje pa leje të armëve të ftohta dhe kanosje. Materialet i kaluan Prokurorisë, për veprime të mëtejshme procedurale.
