Sekretarja e Thesarit e SHBA-së, Janet Yellen, ka thënë se vendet që blejnë naftë nga Moska duhet të formojnë një koalicion që synon ‘të mbyllë’ naftën ruse dhe të parandalojë rritjen e çmimit të energjisë mes sanksioneve.
Yellen u pyet në Forumin e Politikave DealBook DC të New York Times të enjten nëse ishte e mundur të mblidhej ‘një kartel’ blerësish të naftës ruse për të parandaluar që çmimet të rriteshin shumë.
“Do të duhej të kishte një grup mjaft të madh vendesh që do të shkonte së bashku me të. Dhe do të ishte e nevojshme të krijohej një koalicion i tillë.” – u përgjigj Yellen.
“Por unë do theksoja se Bashkimi Evropian tashmë ka njoftuar se do heqë dorë nga blerjet e naftës ruse, por përtej kësaj, ata kanë thënë se do të ndalojnë gjithashtu vendet evropiane që të sigurojnë dërgesat me cisterna jashtë Rusisë dhe Britania e Madhe ka të ngjarë të shkojë së bashku me një ndalim të tillë. Dhe kjo mund të ketë efektin e mbylljes së një pjese të mirë të naftës ruse.”
Në të njëjtën kohë, Yellen pranoi se sanksionet kanë pasur një efekt ‘të madh’ në rritjen globale të kostos së ushqimit dhe energjisë.
“Sanksionet tona kanë qenë jashtëzakonisht efektive, por ne vazhdojmë t’i shtrëngojmë ato dhe çmimet e naftës mund të shkojnë më tej.” – tha ajo.
Komentet e Yellen vijnë dy ditë pasi ajo i tha Senatit se SHBA ka përjetuar ‘nivele të papranueshme’ të inflacionit, veçanërisht në lidhje me çmimet e ushqimit dhe benzinës.
Shumë vende, duke përfshirë Shtetet e Bashkuara dhe vendet anëtare të BE-së, vendosën sanksione gjithëpërfshirëse ndaj Moskës pas fillimit të fushatës ushtarake të Rusisë në Ukrainë në fund të shkurtit.
Brukseli premtoi të heqë dalëngadalë gazin rus deri në vitin 2030 dhe ndaloi importin e naftës ruse nga deti javën e kaluar.
Kremlini paralajmëroi se kufizimi i eksporteve ruse të naftës jo vetëm që do të dëmtojë Rusinë dhe BE-në, por do të ketë ‘një efekt negativ’ në tregun global të energjisë.
