Liverpuli duket se ka arritur një marrëveshje verbale për t’i paguar Benfikës 100 milionë euro për sulmuesin e saj Darwin Nunez.
E raportuar nga eksperti i tregut të transferimeve Fabrizio Romano përmes The Guardian, marrëveshja përbëhet nga 80 milionë euro të garantuara për klubin portugez plus 20 milionë euro të tjera në shtesa.
Kjo do të thotë se lojtari i kombëtares uruguaiane mund të bëhet lojtari më i shtrenjtë i klubit të të gjitha kohërave, me mbrojtësin Virgil van Dijk që mburret deri tani me këtë gjë pasi klubi anglez pagoi rreth 88 milionë euro për të nga Southampton në janar 2018.
Nunez, 22 vjeç, do të ndjekë gjurmët e kolegut të kombëtares, Luis Suarez, i cili udhëhoqi vijën e parë të Liverpulit nga viti 2011 deri në 2014-ën përpara se t’i bashkohej FC Barcelona.
I supozuar se do të arrijë në një kontratë pesëvjeçare, produkti i akademisë së Penarol, Nunez, do jetë i dyti amerikano-jugor që blihet nga ekipi i Klopp këtë vit pasi Luis Diaz iu bashkua nga rivalët e përjetshëm të Benfikës, Porto në një marrëveshje prej 60 milionë eurosh.
Nunez zbarkoi te Benfika nga ekipi spanjoll Almeria, e cila do të marrë 20% të çdo shitjeje në të ardhmen, si pjesë e një marrëveshjeje prej 24 milionë eurosh në shtator 2020.
Duke shënuar 48 gola në 85 paraqitje për klubin me bazë në Lisbonë, ai bëri përshtypje në Ligën e Kampionëve sezonin e kaluar në një grup ku bënin pjesë Barcelona, Bajerni i Mynihut dhe Dinamo e Kievit përpara se Liverpuli të eliminonte Benfikën në çerekfinale.
