Kievi ka përparuar në ‘rrugën e tij evropiane’, por duhet të bëjë më shumë, tha të shtunën presidentja e Komisionit Evropian Ursula von der Leyen gjatë një vizite të papritur në Ukrainë.
Ukraina paraqiti kërkesën e saj zyrtare për anëtarësim në BE më 28 shkurt, katër ditë pasi Rusia filloi operacionin e saj ushtarak në vend.
Udhëheqësit e BE-së pritet të japin një opinion zyrtar gjatë samitit të bllokut më 23-24 qershor nëse Kievit do ‘i jepet statusi i kandidatit. Për këtë kërkohet mbështetja njëzëri e 27 vendeve anëtare.
Duke folur në një konferencë për shtyp me presidentin ukrainas Volodymyr Zelensky në mes të ofensivës së vazhdueshme ushtarake ruse, von der Leyen tha se BE po punon ‘ditë e natë’ në vlerësimin e aplikimit të Ukrainës dhe planifikon ta përfundojë atë deri në fund të javës së ardhshme.
“Ju keni bërë shumë në forcimin e sundimit të ligjit, por ende duhet të zbatohen reforma. Për të luftuar korrupsionin, për shembull, ose për të modernizuar këtë administratë që funksionon mirë, për të ndihmuar në tërheqjen e investitorëve.” – tha ajo.
Duke vënë në dukje se lufta me Rusinë është prioriteti kryesor për Ukrainën dhe mbështetësit e saj tani, von der Leyen tha se Kievi dhe Perëndimi gjithashtu duhet të planifikojnë ‘çfarë duhet bërë më pas’ në drejtim të reformave.
“Sigurisht, Ukraina ishte tashmë në një rrugë të mirë përpara pushtimit të tmerrshëm dhe mizor të Rusisë.” – tha ajo, duke përshëndetur ‘përpjekjet dhe vendosmërinë e madhe’ të Ukrainës në përpjekjen e saj për t’u bashkuar me bllokun.
