Media belge ka dhënë të tjera hollësi lidhur me atentatin ndaj Erion Hasanbelliut në Belgjikë. Sipas saj atentati me gjashtë plumba ndaj shqiptarit ka ndodhur para hyrjes së hotelit në rrugën ‘Adolphe Maxlaan’ në Bruksel, pranë qendrës së qytetit.
Sipas prokurorisë belge, atentatori ka hapur zjarr ndaj 43-vjeçarit krejt befas. Dëshmitarët në vendin e ngjarjes kanë treguar për dy burra që kanë marrë pjesë në atentat ndërsa pohojnë se gjithçka ka ndodhur shumë shpejt.
Sipas prokurorit të ngjarjes, Hasanbelliu është qëlluar me gjashtë plumba në shpinë dhe është në rrezik për jetën pas operimit.
“Ai u godit nga gjashtë plumba në shpinë dhe në të pasme. Ai u operua menjëherë dhe është ende në rrezik për jetën.” – tha Martin François, zëdhënës i prokurorisë publike të Brukselit.
Recepsioni i hotelit ka pamje nga vendi ku ndodhi incidenti.
“Nuk e kemi idenë se kush është viktima, por kamera e sigurisë së hotelit ka filmuar gjithçka. Kolegu im e pa që ndodhi dhe është në shok.” – thotë një punonjës i hotelit.
Sipas dy dëshmitarëve okularë, të cilët ndodheshin pak metra larg vendit të krimit, atentatorët kanë qenë dy persona të rritur të cilët pasi qëlluan shënjestrën janë larguar nga një rrugë anësore e hotelit.
Lagje e pasigurt
Lagjja përreth De Brouckèreplein nuk është e paprekur. Përleshjet, trazirat e bandave ose trazirat e tjera ndodhin shpesh, thotë një oficer sigurie i cili ka vite që punon në qendrën e afërt të minierës në Bruksel. “Nuk është zona më e sigurt këtu, sidomos natën. Unë kam parë shumë këtu.” – ka thënë ai.
Erion Hasanbelliu është ekstraduar nga Belgjika në tetor 2013 pas kërkesës së Tiranës zyrtare. Ai akuzohej se bashkë me të vëllanë, Geron Hasanbelliu, kishin vrarë në vitin 2002 në Belgjikë Julian Çelën e kishin plagosur rëndë Kasandër Nogën.
Më herët, Noga e Çela në vitin 2000 kishin ekzekutuar në dhomën e spitalit babain e Erion e Geron Hasanbelliut, Aqifin e Dritan Hajdinin duke i qëlluar me breshëri automatiku.
