Franca do të rregullojë planin e saj gjashtëvjeçar të shpenzimeve ushtarake pas konfliktit Rusi-Ukrainë, njoftoi të hënën presidenti Emmanuel Macron. Macron tha se ai udhëzoi qeverinë që të ‘kryejë një rivlerësim të programit të shpenzimeve ushtarake në javët e ardhshme, në dritën e kontekstit gjeopolitik’.
Franca ‘ka hyrë në një ekonomi lufte në të cilën besoj se do ta gjejmë veten për një kohë të gjatë’, tha ai gjatë hapjes së ekspozitës së armëve Eurosatory në Paris. Presidenti francez tha se fushata ushtarake e Rusisë në Ukrainë krijoi ‘një nevojë shtesë për të ecur më shpejt dhe për t’u bërë më të fortë me një kosto më të ulët’.
“Sa për këdo që dyshon në urgjencën e këtyre përpjekjeve, ne vetëm duhet t’i hedhim një vështrim tjetër Ukrainës, ushtarët e së cilës kërkojnë armë cilësore dhe kanë të drejtë të marrin përgjigje nga ne.” – vuri në dukje Macron.
Franca dhe anëtarët e tjerë të NATO-s po furnizojnë Kievin me armë, duke përfshirë automjete të blinduara, raketa dhe drone. Macron tha se Evropa ka nevojë për ‘një industri shumë më të madhe të mbrojtjes’ dhe nuk duhet të mbështetet në blerjen e armëve nga gjetkë.
Programi i tanishëm përfshin shpenzimin e 295 miliardë eurove (308 miliardë dollarë) midis 2019 dhe 2025 për modernizimin e ushtrisë franceze. Buxheti vjetor ushtarak është vendosur të arrijë në 41 miliardë euro (43 miliardë dollarë) këtë vit dhe 50 miliardë euro (52 miliardë dollarë) në 2025.
Muajin e kaluar, presidentja e Komisionit Evropian Ursula von der Leyen tha se Evropa do të rrisë mbrojtjen e saj pas konfliktit Rusi-Ukrainë. Ajo tha se vendet e BE-së kishin njoftuar rritje të buxheteve të tyre të mbrojtjes në 200 miliardë euro shtesë (209 miliardë dollarë) në vitet e ardhshme.
