Debate në mbledhjen e sotme të Këshillit Kombëtar të Integrimit Europian.
Debatet mes maxhorancës dhe opozitës nisën pasi kreu i grupit parlamentar të PD-së Enkelejd Alibeaj, iu drejtua zv.kryeministrit Arben Ahmetaj me “Beni” teksa fliste për Agjencinë për Media dhe Informim të ngritur nga qeveria.
Ahmetaj i kërkoi Alibeajt të mos i drejtohej në atë mënyrë.
Më pas, në debat u përfshinë edhe kryetarja e Këshillit të Integrimit Europian, Jorida Tabaku si dhe deputeti i PS-së Petro Koçi.
Ky i fundit iu drejtua zonjës Tabaku me “ti” dhe kjo gjë nuk i pëlqeu as asaj.
Në fund të mbledhjes, Tabaku i kërkoi ndjesë Shoqërisë Civile për komentet jo shumë etike, që u bënë sot.
Debati i plotë:
Enkelejd Alibeaj: Është ngritur Agjencia për Media dhe Informim, drejtohet nga Endri Fuga. Meqë jemi tek Edi, Beni, Endri, po e përdor me emra.
Arben Ahmetaj: Unë thashë flas si zëvendës kryeministër dhe si qytetar, si Beni. Mos vazhdo më me atë
Enkelejd Alibeaj: Jo jo do të vazhdoj
Arben Ahmetaj: Mos vazhdo se do të ta kthej unë tani. Do që ta prishësh mbledhjen?!
Enkelejd Alibeaj: Ktheje si të duash
Arben Ahmetaj: Lëre pra tani, kot
Enkelejd Alibeaj: Më dëgjo deri në fund, se unë pata durim të dëgjoja deri në fund
Arben Ahmetaj: Dhe unë të dëgjoj, por mos më thuaj mua, jo Beni, jo kjo. Stop
Enkelejd Alibeaj: Ta them unë ty atë, këtë gjuhë mos e përdor se nuk të shkon.
Arben Ahmetaj: Beni, Beni. Stop me atë referencë, kaq.
Enkelejd Alibeaj: Bën vetëm një gjë të mirë ti, të mbash ato shënime. Meqë i thotë zonja Çupi
Arben Ahmetaj: Zonja Çupi, por me respekt.
Enkelejd Alibeaj: Beni me respekt të them dhe unë me respekt e kam. Pse acarohesh ti
Arben Ahmetaj: Acarohem me ty
Enkelejd Alibeaj: Të vazhdoj unë dhe vazhdo pastaj ti me përgjigjet
Ndërhyn Petro Koçi, por nuk dëgjohet
Jorida Tabaku: Mua me ti mos mu drejto. Ule zërin aty, mos mu drejto mua me “ti” këtu në mbledhje.
Flet Petro Koçi por nuk dëgjohet në audio
Jorida Tabaku: Kush po bën ironi? Suleni të gjithë me urdhër. A ka mundësi të mbash qetësi këtu, ne po flasim. Mua me ti mos mu drejto, po të them. Qetësohu dhe mos mu drejto me ti, qetësohu. Mund të bëjmë 5 minuta pushim të qetësohet zoti Koço.
Enkelejd Alibeaj e korrigjon: Koçi
Jorida Tabaku: Qetësohu, e menaxhon vetë. S’ka nevojë për njeri që të sulet
Enkelejd Alibeaj: Duhet qetësi, askush të mos ndjehet i fyer në një çështje kaq të rëndësishme. Mbajta shënim çfarë thatë dhe po ju kthej përgjigjet ashtu siç juve ndiheni më rehat. Ju thashë o zv.kryeministër, ose Beni, meqë thatë Beni. Prit tani, janë pyetjet që ju kanë acaruar. Pyetja është: Endri Fuga është drejtori i Agjencisë për Mediat për Informim, s’ka të dhëna si rekrutohen janë mbi 60 veta, çfarë kriteresh ka. Ajo ka qëllim propagandën qeveritare.
