Presidenti serb Aleksandar Vuçiç ka deklaruar këtë të mërkurë se ka rënë dakord për një çmim të favorshëm për importet e gazit natyror rus sipas kushteve të një marrëveshjeje të re energjetike.
“Ne ramë dakord me partnerët rusë për vëllimet me çmimin më të ulët, shumë të ulët, nga 360 në 410 dollarë për 1000 metër kub për 64% deri në 65% të sasisë së gazit që i nevojitet Serbisë.”- citoi TASS Vuçiçin.
“Unë besoj se do të fillojmë të pompojmë vëllimet e para të gazit në fillim të qershorit në Hungari.”- shtoi ai. “Tani kemi 205 milionë metra kub në pjesën tonë të UGS Banatski Dvor. Ne pompojmë gjithçka që mundemi dhe blejmë sot, dhe jo kur gazi do të kushtojë 5000 dollarë.”
Sipas RT-së, udhëheqësi serb e quajti situatën aktuale të furnizimeve me energji “të tmerrshme“, duke vënë në dukje se vendi po “përgatit 1 miliardë euro shtesë për të mbushur boshllëqet”.
Muajin e kaluar, Serbia siguroi një kontratë të re trevjeçare për importin e gazit me Moskën. Kontrata e mëparshme 10-vjeçare e furnizimit me gaz të Beogradit me Gazprom të Rusisë skadoi më 31 maj.
Vuçiç më herët tha se vendi i tij kishte pësuar humbje të konsiderueshme për shkak të sanksioneve të BE-së ndaj Rusisë, veçanërisht ndaj naftës. Ai shtoi se kufizimet do t’i kushtonin Beogradit 600 milionë dollarë në vit.
Edhe pse Serbia nuk është pjesë e Bashkimit Evropian, furnizimet me energji të vendit kalojnë tranzit përmes vendeve të BE-së. Prandaj, çdo sanksion i mundshëm i vendosur nga Brukseli ndaj furnizimeve ruse të energjisë prek Serbinë.
