Një anëtar i partisë politike në pushtet të kryeministrit izraelit Naftali Bennett ka shkaktuar zhurmë duke thënë se nëse do kishte mundësi ai do mund të bënte të zhdukeshin të gjithë arabët palestinezë nga shteti hebre.
“Nëse do të kishte një lloj butoni që mund të shtypej që do t’i zhdukte të gjithë arabët dhe t’i dërgonte ata me një tren ekspres për në Zvicër, unë do ta shtypja atë buton.” – tha deputeti i Knesset-it, Matan Kahana në një fjalim për një grup nxënësish në Bregun Perëndimor.
Kahana, një anëtar i partisë nacionaliste Yamina të Bennett, i cili shërben si zëvendësministër i Shërbimeve Fetare, duket se po thekson se pavarësisht dallimeve të tyre, izraelitët dhe palestinezët nuk kanë zgjidhje tjetër veçse të gjejnë mënyra për të bashkëjetuar.
“Por çfarë mund të bësh? Nuk ka asnjë buton të tillë. Prandaj duket se ne duhej të ekzistonim së bashku në këtë tokë në një farë mënyre.” – vijoi ai.
Komentet e ligjvënësit u kapën në video dhe pamjet u shfaqën të martën nga transmetuesi publik izraelit Kann. Kahana i bëri komentet e tij në përvjetorin e parë të arritjes së Bennett në pushtet duke e bashkuar Yamina me shtatë parti të tjera.
Koalicioni qeverisës është më i larmishmi në historinë e Izraelit, duke bashkuar ligjvënës nga i gjithë spektri politik, duke përfshirë arabët izraelitë.
Sipërmarrja është vlerësuar si një simbol i bashkëpunimit midis segmenteve të shoqërisë që nuk kanë mundur të bëjnë paqe, më shumë se 70 vjet pas themelimit të Izraelit. Në fakt, vetë Kahana e quajti koalicionin një ‘hap të guximshëm’ drejt bashkëjetesës paqësore.
Kahana shtoi se një zgjidhje e propozuar me dy shtete nuk do të sillte paqe.
“Arabët po i tregojnë vetes një histori tjetër. Ata po i thonë vetes se janë ata që kanë jetuar gjithmonë këtu dhe ne erdhëm dhe i dëbuam.” – u tha ai nxënësve.
Anëtarët e partisë së Listës së Bashkuar Arabe (Ra’am), një partner i koalicionit qeverisës, ishin në mesin e atyre që u zemëruan nga videoja e Kahana.
“Matan Kahana, ne jemi këtu sepse ky është atdheu ynë.” – tha ligjvënësi Ra’am, Ëalid Taha.
“Ju dhe ata që mendojnë si ju, do të vazhdoni të mbani zhgënjimin tuaj sepse ne thjesht nuk do të zhdukemi.”
Një tjetër anëtar i koalicionit, Eli Avidar i partisë konservatore Yisrael Beytenu, e quajti deklaratën e Kahana-s ‘një deklaratë të mjerë’.
“Është turp që u tha.” – shtoi ai.
“Arabët janë qytetarë izraelitë dhe ata janë këtu për të qëndruar. Ajo që ne duhet të heqim janë vërejtjet dhe opinionet fanatike.”
Kahana iu përgjigj zhurmës në Twitter, duke thënë se disa nga komentet e tij për nxënësit ishin ‘të formuluara keq’.
