Ukraina duhet të marrë më shumë armë të rënda të NATO-s, tha kreu i bllokut ushtarak, përpara një takimi të një ‘grupi kontakti’ të udhëhequr nga SHBA, i krijuar për të diskutuar logjistikën e planit. NATO po përpiqet t’i përshtatet kërkesave ‘vazhdimisht në ndryshim’ nga Kievi, sipas të dërguarit amerikan në bllok.
“Ukraina duhet të ketë më shumë armë të rënda dhe aleatët dhe partnerët e NATO-s kanë ofruar armë të rënda dhe ato gjithashtu po rriten.” – tha Sekretari i Përgjithshëm i saj Jens Stoltenberg të martën në Hagë, ku u takua me udhëheqësit e shtatë vendeve anëtare përpara datës së samitit të NATO-s të planifikuar për në fund të qershorit.
“Për sa i përket armatimit, ne qëndrojmë të bashkuar se është thelbësore që Rusia të humbasë luftën.” – tha kryeministri holandez Mark Rutte, i cili priti takimin.
“Dhe meqenëse nuk mund të kemi një përballje të drejtpërdrejtë midis trupave të NATO-s dhe Rusisë, ajo që duhet të bëjmë është të sigurohemi që Ukraina të mund ta luftojë atë luftë, që të ketë qasje në të gjitha armatimet e nevojshme.” – shtoi ai.
Në takimin në Holandë morën pjesë edhe presidenti rumun Klaus Johannis, kryeministrja daneze Mette Frederiksen, kryeministri belg Alexander De Croo, kryeministri polak Mateusz Moraëiecki, kryeministri portugez Antonio Costa dhe ai i Letonisë Krisjanis Karins.
Stoltenberg ka vizituar më parë Suedinë dhe Finlandën, të cilat kanë aplikuar për t’u anëtarësuar në NATO, por me shumë mundësi nuk do të ftohen zyrtarisht në samitin e 29-30 qershorit në Madrid, për shkak të kundërshtimeve turke.
Ndërkohë, Përfaqësuesja e Përhershme e SHBA-së në NATO, Julianne Smith u raportua të thoshte se shtetet e NATO-s po përpiqen të përshtaten me kërkesat e Kievit për armë shtesë, të cilat vazhdimisht ndryshojnë.
Mikhail Podolyak, këshilltar i presidentit ukrainas Volodymyr Zelensky, ka thënë se Kievit i duhen urgjentisht 1000 aviatorë, 300 sisteme raketashe, 500 tanke, 2000 automjete të blinduara dhe 1000 dronë.
