Presidenti amerikan Joe Biden do të kandidojë sërish për postin në vitin 2024, ka thënë Sekretarja e Shtypit e Shtëpisë së Bardhë, Karine Jean-Pierre.
Biden dhe zyrtarë të lartë të administratës kanë konfirmuar tashmë në mënyrë të përsëritur qëllimin e tij për të rikandiduar, vuri në dukje ajo.
“Presidentit, siç e dini, i është bërë shumë herë kjo pyetje dhe ai i është përgjigjur. Përgjigja e tij ka qenë mjaft e thjeshtë, e cila është: Po, ai kandidon për rizgjedhje. Nuk mund të them më shumë se kaq.” – tha Jean-Pierre gjatë një konference për shtyp.
Biden është përballur me shqetësime në rritje për moshën e tij dhe çështjet shëndetësore, me madje edhe kolegë demokratë që sugjerojnë se ato mund të jenë pengesa në rrugën e tij për t’u rizgjedhur. Presidenti, i cili është 79 vjeç, do të jetë 86 në fund të një mandati të dytë.
Duke folur veçmas për CNN, Jean-Pierre kritikoi një raport të New York Times që citonte ‘dhjetëra zyrtarë demokratë të frustruar, anëtarë të Kongresit dhe votues’, të cilët sugjeruan që Biden të zëvendësohej nga dikush tjetër si kandidati i partisë për vitin 2024.
Ndër të tjera, NYT citoi David Axelrod, kryestrategun për dy fushatat e suksesshme presidenciale të Barack Obamës, i cili tha se mosha e presidentit ishte bërë tashmë një ‘çështje madhore’.
