Autoriteti i Konkurrencës ka mbyllur procedurën e monitorimit të zbatimit të vendimit të vitit 2020, që autorizonte blerjen e koncesionit të Aeroportit Ndërkombëtar të Tiranës nga kompania Kastrati.
Në vendimin për mbylljen e monitorimit, Komisioni i Konkurrencës ka arritur në përfundimin se blerësi i ka zbatuar detyrimet e vendosura në vendimin e mësipërm, që autorizonte transaksionin me disa detyrime dhe me një periudhë njëvjeçare monitorimi.
Komisioni i Konkurrencës konstatoi se Tirana International Airport SHA (TIA), ka respektuar detyrimin për të zbatuar kushte të barabarta për veprime të njëjta tregtare me palët që do të operojnë në këtë aeroport (shoqëritë ajrore përfshirë dhe ato me kosto të ulët (low cost), duke ndërmarrë politika të zgjerimit të kompanive të fluturimit dhe rritje të numrit të destinacioneve, operon me tarifa të rregulluara nga qeveria shqiptare.
Gjithashtu, shoqëria Kastrati Group SHA, nëpërmjet shoqërisë Tirana International Airport SHA, ka respektuar detyrimin e përcaktuar në pikën 2 të vendimit nr. 755, datë 09.12.2020, për të mos abuzuar me pozitën dominuese në tregun e shërbimeve të infrastrukturës aeroportuale që i ofrohen linjave ajrore dhe shërbimet e asistencës në tokë.
Mbështetur në informacionin e depozituar, Komisioni i Konkurrencës ka konstatuar se gjatë dy viteve të fundit, TIA ka shtuar përpjekjet për hartimin dhe zbatimin e politikave të marketingut ndaj të gjitha kompanive ajrore.
Kompania me kosto të ulët Wizz Air ka rritur ndjeshëm praninë e saj në Aeroportin e Tiranës, me 6 avionë të bazuar në TIA dhe planifikon të shtojë dhe dy të tjerë gjatë vitit 2022. Transportuesit shqiptarë Albaëings dhe Air Albania kanë rritur gjithashtu praninë e tyre në TIA dhe kanë plane për zgjerim destinacionesh.
Sipas vendimit, TIA shërben si nyje (Hub) për 11 kompani ndërkombëtare që ofrojnë shërbime tranziti, duke shtuar mundësinë e fluturimeve tranzit ku pasagjeret zgjedhin aeroportin ku duan të kryejnë tranzitin në bazë të orarit, çmimit, kohës së pritjes. Kompanitë LOT dhe Fly Dubai kanë shtuar mundësinë e fluturimeve tranzit për në Amerikën e Veriut, Azi dhe Australi (Fly-Dubai në kod share me Emirates).
Gjithashtu, grupi Lufthansa, si një ndër grupet më dominuese në aviacion, fluturon nga TIA nëpërmjet hub-it të Frankfurtit, Munihut, Vjenës dhe nga nëntori 2021 nëpërmjet hub-it të Zvicrës. TIA ka negociuar dhe ka paraqitur një plan biznesi pranë British Airways (BA) dhe duke bërë të mundur ndryshimin e aeroportit ku BA operon, nga London Gatwick në Heathrow.
“TIA gjatë vitit 2021 ka nisur punimet për ofrimin e shërbimit aeroportual ekskluziv për avionët charter (General Aviation Area), shërbim që do të jetë plotësisht operativ gjatë gjysmës së dytë të vitit 2022. Avionët charter privat do të kenë mundësi të operojnë nga ky terminal i veçantë, i cili plotëson të gjitha kriteret aeroportuale si pikë e re udhëtimi. TIA ka hartuar një strategji për rritjen e numrit të turizmit, sidomos atij që gjenerohet jashtë Shqipërisë (incoming).
TIA ka kryer një sërë vizitash pranë zyrave qendrore të operatorëve turistikë të huaj dhe të linjave ajrore përkatëse, ku ka prezantuar potencialin e turizmit shqiptar, mundësitë e zhvillimit të një turizmi të qëndrueshëm që është dhe fillimi i TIA-s për të patur turizëm gjatë të gjithë vitit. TIA ka organizuar FAM TRIPS (udhëtime familjarizimi) në Shqipëri të operatorëve të huaj, ku ne fokus të axhendës kanë qenë takimet business to business.
Në këtë mënyrë janë shtuar destinacionet dhe shifrat e turizmit nga Polonia, Ukraina, Kroacia, Republika Çeke, vendet nordike. Tregjet e reja si Arabia Saudite, Egjipti, dhe Bullgaria pritet të konsolidohen më tej gjatë sezonit veror 2022-2023.
Gjithashtu TIA ka punuar me Aegean Airline për të bërë të mundur fluturime direkte në ishujt turistike të Kretës dhe Rodos. Ky treg është rritur me 25%,” thuhet në vendimin e Komisionit të Konkurrencës.
Sipas statistikave të depozituara, rezulton se numri i pasagjerëve që kanë udhëtuar nëpërmjet TIA gjatë vitit 2021 të jetë rritur me rreth 45% krahasuar me vitin 2020, ndërkohë që numri i avionëve në nisje nga TIA për vitin 2021 është rritur me rreth 58% krahasuar me vitin 2020.
Autoriteti nënvizon gjithashtu se me ligjin nr. 16/2021 datë 08.02.2021 “Për ratifikimin e ndryshimit të Marrëveshjes së Koncesionit ndërmjet Këshillit të Ministrave të Republikës së Shqipërisë dhe shoqërisë koncesionare “Tirana International Airport”, SHPK, “Për ndërtimin, vënien në punë, operimin dhe mirëmbajtjen e aeroportit ndërkombëtar “Nënë Tereza”, Tiranë”, është miratuar një ndryshim në pikën 2 të Shtojcës 7 “Pagesa për Pasagjerët”, duke reduktuar pagesën bazë për pasagjerët nga 12.5 Euro në 10 Euro për personat mbi 12 vjeç dhe nga 5 Euro në 3 Euro për fëmijë nga 2 deri në 12 vjeç. / E. Shehu.
VINI RE: Ky material është pronësi intelektuale e Monitor
