Kryeministri Edi Rama ka vizituar sot Peshkopinë në kuadër të turit të takimeve për përzgjedhjen e drejtuesve të rinj vendor në 61 bashkitë e vendit.
Gjatë fjalës së tij, Rama tha se partia duhet ripërtërirë vazhdimisht për të qenë në lartësinë e sfidës dhe ka nevojë vazhdimisht “për gjak e energji të reja”.
“Duke parë mirë rezultatet duke u përpjekur t’i lexojmë siç duhet duke mos u kënaqur me atë që kemi arritur dhe duke shtirë reagimin në proçese ripërtëritëse të PS. Partia është një trup që duhet ripërtërirë vazhdimisht për të qenë në lartësinë e sfidës dhe ka nevojë vazhdimisht për gjak e energji të reja, për të parë përtej pikës ku ka mbërritur.
Edhe këtë herë e kemi nisur menjëherë pas zgjedhjeve të shkuar situatën në të gjitha bashkitë dhe nuk është rastësi që këtë herë procesi i zgjedhjeve në parti është ndryshe e ka një risi si rezultat i një analize të brendshme dhe një vendimi të marrë në Kongres. Është shumë e rëndësishme të rrisim shkallë e përgjegjësisë në anëtarësi lidhur me arsyet se përse jemi pesë e kësaj familjeje, qëllimet, aspiratat dhe ëndrrat e njerëzve që kjo parti duhet të përfaqësojë.
Ndaj është e rëndësishme që procesi të zhvillohet deri në fund me krijimin e mundësisë për këdo ka ambicie për një rol në parti. Siç kemi rënë dakord kudo që kemi kandidatura të mira që vlerësohen nga Komisioni i Posaçëm për të bërë seleksionimin e tyre dhe qëllon që kandidaturat janë edhe një grua edhe një burrë, ne do të vijojmë në drejtimin e partisë me bashkë drejtim.
Kudo ku organizatat janë të bashkë drejtuara me barazi gjinore, rezultatet janë më të mirë.”- u shpreh ai.
Mes të tjerash, kryeministri kërkoi mbështetjen e qytetarëve për kryetarin e bashkisë Muharrem Ramën.
“Duhet ta rikonfirmojmë kryetarin e bashkisë, të paktën deri tani janë fjalë të mira. Mos e marrim mësysh kryetarin e bashkisë. Përveçse ta rikonfirmojmë kryetarin e bashkisë në zgjedhjet e ardhshme vendore është një drejtues që do të bëjë shumë punë, por duhet të rimarrim ato mandatet e tjera që ne na takojmë në zgjedhjet e ardhshme të përgjithshme sepse ne jemi këtu për një rrugëtim të gjatë, deri në 2030.”– tha Rama.
