Një konflikt ushtarak me Rusinë duket të jetë kushti për një pranim të shpejtë në Bashkimin Evropian, tha të enjten ministri i Brendshëm serb Aleksandar Vulin, duke shtuar se, nëse do të ishte kështu, Serbia nuk do nxitonte me ofertën e saj.
Të enjten, Këshilli Evropian ra dakord t’i jepte statusin kandidat Ukrainës dhe Moldavisë. Ndërsa anëtarësimi në BE ka qenë një pikë kryesore bisedimi për politikanët ukrainas properëndimorë për dekada, përpjekjet e Kievit për t’u bashkuar me bllokun janë rigjallëruar në mes të konfliktit të vazhdueshëm me Rusinë.
Duke u bërë kandidate, Ukraina dhe Moldavia iu bashkuan Shqipërisë, Maqedonisë së Veriut, Malit të Zi, Serbisë dhe Turqisë në dhomën e pritjes së BE-së.
Duke theksuar se Ukraina nuk përmbush standardet të cilat janë ‘aplikuar me kaq kujdes në vendet e Ballkanit’, ministri pohoi se ‘pjesëmarrja e Kievit në luftë ishte e mjaftueshme për të nisur negociatat’.
Ai, me ironi, shprehu shpresën se ‘Moldavia nuk duhej të premtonte se do të shkonte në luftë’ për të marrë një status kandidat dhe vuri në dukje se nëse një luftë ishte kriteri i vetëm, ‘Serbia mund të kishte filluar negociatat në 1999’.
Duke vënë në dukje se përpara vendimit të saj për kandidaturat e Ukrainës dhe Moldavisë, BE-ja nuk ishte ‘një aleancë ushtarake’, Vulin uroi që Maqedonia e Veriut dhe Shqipëria të mos kishin nevojë të hynin në luftë me askënd për hir të pranimit të tyre në BE.
Vërejtjet e ministrit serb i bënë jehonë deklaratës së zëdhënëses së Ministrisë së Jashtme ruse Maria Zakharova për të njëjtën çështje. Ajo pretendoi se objektivi kryesor i BE-së, frenimi i Rusisë, e shtyu BE-në të mbyllte një sy ndaj kritereve strikte të anëtarësimit që janë aplikuar për kandidatët e tjerë të BE-së.
