Pekini do përdorë të gjitha mjetet e mundshme për të rimarrë kontrollin mbi Tajvanin, përfshirë ato ushtarake, tha ambasadori kinez në Francë, Lu Shaye.
“Ne nuk mund ta lëmë Tajvanin të pavarur.” – këmbënguli Lu gjatë intervistës së tij të enjten me kanalin YouTube Livre Noir.
“Ne do ta rimarrim Tajvanin me të gjitha mjetet, duke përfshirë edhe ato ushtarake. Nëse nuk mund ta ribashkojmë vendin me mjete paqësore, çfarë tjetër na mbetet të bëjmë?” – theksoi ai.
Ambasadori ka fajësuar SHBA-në për nxitjen e tensioneve rreth Tajvanit dhe Ukrainës, ku operacioni ushtarak i Rusisë është në vazhdim.
“Amerikanët duan të fillojnë dy luftëra në botë: një në Evropë, tjetra në Azi.” – tha ai.
Megjithatë, Lu hodhi poshtë çdo krahasim midis lëvizjes së mundshme të Kinës kundër Tajvanit dhe veprimeve ruse në Ukrainë.
“Tajvani nuk është një shtet sovran. Ai ka qenë një pjesë integrale e Kinës që nga kohërat e lashta.” – shpjegoi ai.
Pekini ka rritur kohët e fundit aktivitetin e tij ushtarak detar dhe ajror rreth ishullit, duke thënë se kjo ishte e nevojshme për të penguar ‘aktivitetet e marrëveshjes së fshehtë’ midis ‘forcave të pavarësisë së Tajvanit’ dhe qeverisë së SHBA.
Tajvani është vetëqeverisur që nga viti 1949, por asnjëherë nuk e ka shpallur zyrtarisht pavarësinë e tij nga Kina. SHBA-ja nga ana e saj edhe pse pajtohet me politikën e një Kine, mban lidhje të forta jozyrtare me Taipein, duke i shitur armë ishullit dhe duke mbështetur shtytjen e tij për sovranitet.
