Fermerë të Lushnjës kanë zhvilluar një protestë ditën e sotme si pakënaqësi ndaj çmimeve me të cilat blihen produktet e tyre.
Ata ankohen se nuk po i shitet malli dhe se me çmimin që i kërkohet nuk nxjerrin dot as shpenzimet.
Fermerët bëjnë me faj keq menaxhimin e qeverisë për situatën me çmimet.
“Ka ngelur malli. Të nxjerrim gjysmën e shpenzimeve. Nuk po shitet malli. Shkak menaxhimi nga qeveria. Ma merr shalqirin me 10 lekë”, shprehen fermerët.
Në mbështetje të fermerëve ka qenë edhe deputeti socialist Erion Braçe i cili akuzoi tregtarët e pikave të grumbullimit për lojë në dëm të fermerëve.
Ai bëri përgjegjës qeverinë, konkretisht Ministrinë e Financave se nuk ushtron kontroll, teksa propozoi që shteti të ndërtojë pika grumbullimi duke ia hequr monopolin tregtarëve privatë.
“Problemet janë shumë të mëdha. Problemi i parë dhe themelor është ai që e thashë pardje dhe që vazhdoj ta theksoj, jemi në mes të 10 ditëshit, kur fillon loja thonë grumbulluesit. Mos grumbullo sot, mos grumbullo nesër, lëri tre ditë, lëri katër ditë pa grumbulluar shalqi me qëllim që çmimi të ulet poshtë. Po kur këta nuk marrin asnjëri faturë dhe qeveria gënjehet atje, organet fiskale gënjehen atje matanë me fatura që nuk bëhen në prezencë të këtyre, por bëhen nëpër zyrat e tyre për të justifikuar lojën atëherë Ministria e Financave duhet të jetë këtu”, deklaroi Braçe.
