Gazetarë, aktivistë dhe përfaqësues të shoqërisë civile janë mbledhur sot përpara kryeministrisë për të protestuar kundër sjelljes së kryeministrit Edi Rama, ndaj gazetarit Klevin Muka, të cilin e ka ndaluar të marrë pjesë në konferencat e tij për shtyp në tre muajt e ardhshëm.
Kreu i Unionit të Gazetarëve Aleksandër Çipa, gjatë fjalës së tij tha se do të kërkojë një shkresë zyrtare nga Kryeministria për përjashtimin e gazetarit nga konferenca dhe më pas gazetarët do shohin si opsion dhe bojkotin e konferencave.
“Unioni i Gazetarëve nesër do të paraqesë një kërkesë zyrtare për të zbardhur fjalën e Kryeministrit në Konferencë. Sepse e shkruara mbetet. Agjencia për Informim pranë kryeministrit, të na japë një letër zyrtare ku përjashton zyrtarisht dy reporteët tanë nga pjesëmarrja në konferencat.
Pas kësaj presim reagimin e Komisionerit Publik. Pavarësisht se zgjidhet nga Parlamenti, komisioneri është në shërbim të interesit publik. Jemi para një incidenti që s’ka ndodhur më parë. Pastaj të shohim bojkotin e konferencave.”– tha Çipa.
