Ministria e Jashtme kineze ka denoncuar drejtorin e FBI-së, Christopher Wray dhe drejtorin e MI5, Ken McCallum lidhur me akuzat ndaj Pekinit për vjedhjen e teknologjisë perëndimore dhe për paraqitjen e një ‘rrezik të përhapur’ për sigurinë kombëtare. Akuza të tilla janë gënjeshtra, tha ministria.
Në një konferencë të rrallë të përbashkët shtypi në Londër të mërkurën, Wray dhe McCallum paralajmëruan udhëheqësit e biznesit se Kina ishte e vendosur të vidhte teknologjinë e tyre dhe përdorte një program hakerimi ‘më të madh se ai i çdo vendi’, sipas raporteve të shumta të mediave mbi ngjarjen.
McCallum shtoi se qeveria e Kinës ushtron ‘presion të fshehtë në të gjithë globin’ dhe paraqet sfida të mëdha për sigurinë kombëtare të SHBA-së dhe Britanisë së Madhe. Ai shtoi se MI5, një agjenci vendase afërsisht e ngjashme me FBI-në, po kryen shtatë herë më shumë hetime të përqendruara në Kinë sesa në vitin 2018.
Ndërsa shefi i inteligjencës britanike paralajmëroi se ‘veprimtaria armiqësore po ndodh në tokën e Mbretërisë së Bashkuar tani’, Pekini i hodhi poshtë me vendosmëri akuzat, me ambasadën e tij në Londër që i etiketoi vërejtjet ‘plotësisht të pabaza’.
Zëdhënësi i Ministrisë së Jashtme Zhao Lijian u tha gazetarëve të enjten se Wray ‘ka luajtur me të ashtuquajturin kërcënim të Kinës për të njollosur dhe sulmuar Kinën’.
“Faktet kanë vërtetuar plotësisht se SHBA-ja është kërcënimi më i madh për paqen, stabilitetin dhe zhvillimin botëror.” – vazhdoi ai, duke shtuar se Kina i bën thirrje Uashingtonit që të ‘ndalojë përhapjen e gënjeshtrave dhe të ndalojë së bëri komente të papërgjegjshme’.
Lidhur me McCallum, Zhao tha se dy agjencitë kryesore të inteligjencës në Mbretërinë e Bashkuar, MI5 dhe MI6, janë ‘të dyja eksperte në mbjelljen e spiunëve’ dhe ‘po përpiqen të projektojnë veprimet e tyre të turpshme në Kinë përmes këtyre raporteve të rreme, të bujshme’.
“Ky shef i shërbimit të sigurisë në Mbretërinë e Bashkuar duhet të largojë demonët e përfytyruar, të largohet nga dhoma e errët dhe të shohë dritën e diellit dhe të ndalojë së krijuari armiq të rremë.” – vijoi ai.
Kina është përballur prej kohësh dhe ka hedhur poshtë pretendimet për krim kibernetik dhe spiunazh industrial. Përdorimi i pretenduar i firmave teknologjike kineze nga Pekini për të mbledhur të dhëna për përdoruesit perëndimorë ka çuar në futjen në listën e zezë të dhjetëra prej këtyre firmave nga Uashingtoni dhe Kina është fajësuar për një mori sulmesh kibernetike dhe incidente të vjedhjes së pronës intelektuale, të provuara dhe të paprovuara.
Pekini thuhet se ka shqetësimet e veta se kompanitë perëndimore mund të përdorin prodhimet e tyre për të kryer mbikëqyrje në Kinë. Mes pretendimeve dhe kundërpretendimeve, Sekretari i Shtetit i SHBA-së Antony Blinken do takohet këtë javë me ministrin e Jashtëm kinez Wang Yi gjatë një mbledhjeje të Ministrave të Jashtëm të G20 në Bali, Indonezi.
Blinken akuzoi Kinën javën e kaluar se ‘kërkon të minojë rendin ndërkombëtar të bazuar në rregulla’ dhe pritet të përpiqet të bëjë presion ndaj Ëang që të kufizojë partneritetin në rritje të Kinës me Rusinë, sipas zyrtarëve amerikanë.
Kina deri më tani ka kundërshtuar të dënojë Rusinë për operacionin e saj ushtarak në Ukrainë, ose të mbështesë sanksionet perëndimore kundër Moskës.
