Në një deklaratë për mediat deputeti i PD-së Belind Këlliçi, ka sulmuar ashpër kryeministrin Edi Rama dhe qeverinë e drejtuar prej tij, duke thënë se është kthyer në një “qeveri të vdekjes”.
Kjo sepse sipas tij, nuk po i lë në paqe as të vdekurit, duke iu referuar kështu rastit të një zonje të ndjerë në emrin e së cilës figurojnë borxhe dhe padi në gjykatë.
“Sipas traditës, shqiptari e ka zakon që, pas vdekjes së të afërmit, i shlyen çdo borxh që mund t’i ketë mbetur të ndjerit Për t’ia lënë pa barrë dhe pa gjynahe kalimin në jetën e pasosur.
Qeveria e Edi Ramës, e kthyer në ‘qeveri të vdekjes’, punon për të kundërtën. Pasi rriti borxhin publik, duke zhytur në kamata të gjallët, nuk lë në paqe as të vdekurit.
Kështu, edhe me Gjyste Sermin e ndjerë, të vdekur para dy vitesh, në emrin e së cilës figurojnë disa borxhe dhe padi në gjykatë.
E gjitha kjo si pasojë e makinacioneve të njerëzve të lidhur me aferën e inceneratorëve, në përpjekje për të fshehur dhe pastruar miliona eurot e skandalit të shekullit.
Firma e Gjyste Sermit është falsifikuar dhe përdorur në veprime antiligjore, dy herë kur ishte në prag të vdekjes, dhe tri herë pas vdekjes.
Në emrin e saj, post mortem, qarkulluan 5.5 milionë euro.
Në QKB janë bërë disa veprime nën firmën e saj, edhe pse statusi në gjendjen civile e shënonte si ‘e vdekur’.
Kjo është një histori makabre keqpërdorimi të emrit, nderit dhe varrit të një shqiptareje. Zhbërja dhe turpërimi i një tradite të lashtë.”- deklaroi Këlliçi.
Ai shton se PD i dënon ashpërsisht mashtruesit dhe hajdutët e pasurisë publike dhe i bën thirrje SPAK-ut të nisë hetimet sa më shpejt.
“Partia Demokratike i dënon ashpërsisht përdhosësit, mashtruesit kronikë dhe hajdutët serialë të pasurisë publike.
Ata kanë emra dhe portrete të ndryshëm, por që të gjithë gjallojnë nën hijen e Edi Ramës, ministrave dhe bandës së inceneratorëve.
I bëjmë thirrje SPAK të dalë nga letargjia, të ndjekë paranë, dhe gjurma e tyre do ta çojë te porositësit e skemës.
Në emër të dinjitetit dhe të ligjit duhen ndalur sa më parë ata, babëzia e të cilëve nuk ndalet para asgjëje.
Ka ardhur koha që t’i themi ‘boll vodhe, IK!’ kësaj qeverie të vdekjes.”- përfundon deputeti demokrat.
