Mungesa e gazit dhe kostot e larta të ngrohjes mund të bëjnë që shumë gjermanë të mos jenë në gjendje të përballojnë faturat e tyre të ngrohjes këtë dimër, raportoi të dielën tabloidi gjerman Bild, duke shtuar se Shoqata e Qyteteve dhe Komunave të vendit ka sugjeruar që në vend të kësaj t’u ofrohen njerëzve më të rrezikuar vende publike për ‘ngrohje’. Disa qytete gjermane kanë vazhduar tashmë me plane të tilla, shtoi gazeta.
Qyteti gjerman perëndimor i Ludwigshafen është gati të shndërrojë arenën e tij ‘Friedrich-Ebert-Halle’ në një sallë gjigante ngrohjeje, raportoi Bild, duke cituar kryebashkiaken e qytetit, Jutta Steinruck.
Objekti që dikur priste ngjarje sportive, ekspozita dhe koncerte dhe shërbente si qendër vaksinimi gjatë pandemisë Covid-19, tani mundësisht do i shpëtojë njerëzit nga temperaturat e ngrira të dimrit, sipas raporteve të mediave.
“Jemi duke u përgatitur për të gjithë skenarët e emergjencës për vjeshtë dhe dimër.” – tha kryebashkiakja për Bild. Masa vjen pasi Shoqata e Qyteteve dhe Bashkive kërkon që praktika të ngjashme të miratohen nga qytetet në të gjithë Gjermaninë.
“Askush nuk mund të thotë saktësisht se sa dramatike do të jenë zhvillimet.” – tha kreu i shoqatës, Gerd Landsberg për tabloidin, duke shtuar se duhet konsideruar ngritja e ‘ishujve të nxehtësisë’ dhe ‘dhomave të ngrohta, ku njerëzit mund të qëndrojnë, edhe gjatë një dimri shumë të ftohtë’.
Sipas Bild, Gjermania mund të përjetojë jo vetëm një rritje tjetër të çmimit në dimrin e ardhshëm, por të përballet me një mungesë të shpejtë të furnizimit me energji në rast se Rusia ndalon plotësisht furnizimet e saj me gaz për çfarëdo arsye.
Në fillim të kësaj jave, zëdhënësi i Kremlinit, Dmitry Peskov tha se Moska garanton furnizim të besueshëm me energji për Evropën, duke shtuar se klientët evropianë nuk do të shohin më faturat e shërbimeve ‘jashtë normales’.
Qytetet gjermane perëndimore të Neustadt, Frankenthal dhe Landau kanë planifikuar gjithashtu të krijojnë ‘ishuj të nxehtë’ të tyre për dimër, sipas Bild. Strategji të tjera të kursimit të energjisë përfshijnë fikjen e ndriçimit të jashtëm për ndërtesat publike dhe semaforët gjatë natës.
Qyteti i Dyseldorfit planifikon të ulë temperaturat e ngrohjes për vjeshtë dhe dimër për të kursyer energji, raportoi Bild. Përdorimi i ajrit të kondicionuar në verë duhet të zvogëlohet gjithashtu, shtoi ai.
Muajin e kaluar, monopoli rus i gazit Gazprom zvogëloi rrjedhën përmes tubacionit Nord Stream në 40% të kapacitetit, duke përmendur rreziqet operacionale pasi Kanadaja nuk kishte kthyer një turbinë tubacioni të dërguar atje për mirëmbajtje.
Otava tha të shtunën se do e kthejë turbinën në Gjermani, pas kërkesave të Berlinit. Moska kishte thënë më herët se furnizimet me gaz në Evropë do rriteshin nëse turbina do kthehej. Megjithatë, më 11 korrik, Gazprom është vendosur të mbyllë Nord Stream për 10 ditë për mirëmbajtjen e planifikuar. Gjatë kësaj kohe, të gjitha rrjedhat e gazit përmes tubacionit do të ndalen.
Zhvillimet vijnë në mes të përpjekjeve të BE-së për të zvogëluar varësinë e bllokut nga energjia ruse mes një ngecjeje për veprimin ushtarak të Moskës në Ukrainë.
