Arabia Saudite është e gatshme të rrisë prodhimin e naftës në maksimum duke shkuar në 13 milionë fuçi në ditë, por nuk ka kapacitet për të nxjerrë më shumë, tha Princi i Kurorës Mohammed bin Salman gjatë fjalimit të tij në samitin amerikano-arab në Jeddah.
“Mbretëria ka njoftuar një rritje të nivelit të kapacitetit të saj të prodhimit në 13 milionë fuçi në ditë, pas së cilës mbretëria nuk do të ketë asnjë kapacitet shtesë për të rritur prodhimin.” – u citua ai të thoshte nga gazeta e Emirateve të Bashkuara Arabe The National.
Princi i kurorës tha gjithashtu se komuniteti global duhet të bashkojë forcat për të mbështetur ekonominë mbarëbotërore, por vuri në dukje se politikat jo të vërteta në lidhje me burimet e energjisë vetëm do ta përkeqësonin situatën.
“Miratimi i politikave jo të vërteta për të pakësuar ndotjet duke përjashtuar burimet kryesore të energjisë do çojë në vitet e ardhshme në inflacion të paprecedentë dhe një rritje të çmimeve të energjisë dhe rritje të papunësisë dhe një përkeqësim të problemeve serioze sociale dhe të sigurisë.” – tha ai.
Fjalët e Mohammed bin Salman vijnë një ditë pas bisedimeve të tij me Joe Biden, i cili ishte në Arabinë Saudite në vizitën e tij të parë si president i SHBA-së, dhe i kërkoi mbretërisë të rrisë prodhimin e naftës në mënyrë që të zvogëlojë varësinë globale në furnizimet nga Rusia.
Duke komentuar udhëtimin e tij në mbretëri, Biden tha se ‘burimet energjetike të Arabisë Saudite janë jetike për zbutjen e ndikimit në furnizimet globale të luftës së Rusisë në Ukrainë’.
Arabia Saudite, një nga eksportuesit më të mëdhenj të naftës në botë dhe prodhuesi kryesor brenda Organizatës së Vendeve Eksportuese të Naftës (OPEC), aktualisht pompon më shumë se 12 milionë fuçi naftë në ditë. Mbretëria tha më parë se planifikon të arrijë kapacitetin e prodhimit deri në 13 milionë fuçi në ditë deri në vitin 2027.
