Një mbyllje e plotë e furnizimeve me gaz rus në BE mund të zvogëlojë GDP-në e vendeve anëtare më të cenueshme deri në 6% dhe t’i dërgojë ato në recesion, tha Fondi Monetar Ndërkombëtar në një postim në blog.
Paralajmërimi vjen mes frikës se dërgesat e gazit rus në Evropë përmes tubacionit Nord Stream 1 mund të mos rifillojnë pasi mirëmbajtja rutinë vjetore të përfundojë sot.
Në fillim të kësaj jave, Wall Street Journal, duke cituar Komisionerin Evropian të Buxhetit Johannes Hahn, raportoi se Komisioni Evropian nuk priste që tubacioni të rifillonte.
Të martën, zëdhënësi i komisionit tha se po planifikonte të gjithë skenarët në lidhje me rrjedhat e gazit rus në Evropë përmes gazsjellësit Nord Stream 1.
Sipas burimeve të Reuters, flukset e gazit do të rifillojnë siç ishte planifikuar ‘por me më pak se kapaciteti i tij i plotë’.
FMN vuri në dukje se Evropës i mungon një plan gjithëpërfshirës për të përballuar mungesat e gazit, të cilat mund të çojnë në rritje të çmimit të energjisë dhe rritje më të ngadaltë.
Fondi me bazë në Uashington tha se Hungaria, Sllovakia dhe Republika Çeke janë tre vendet anëtare të BE-së që mund të vuajnë më shumë në rast të një mbylljeje të plotë.
“Perspektiva e një mbylljeje të plotë të paparë po nxit shqetësimin për mungesat e gazit, çmimet akoma më të larta dhe ndikimet në ekonomi.
Ndërsa politikëbërësit po lëvizin me shpejtësi, atyre u mungon një plan për të menaxhuar dhe zbutur ndikimin.” – shkroi FMN.
Duke paralajmëruar se Evropa Qendrore dhe Lindore mund të shohin mungesa deri në 40% të konsumit të gazit dhe se GDP mund të tkurret deri në 6%, fondi sugjeron që këto vende duhet të sigurojnë ‘furnizime të tjera dhe burime energjie’ dhe të nxisin kursimet e energjisë.
FMN-ja vë në dukje se infrastruktura energjetike e Evropës dhe furnizimi global deri më tani janë përballur me një rënie prej 60% të dërgesave të gazit rus që nga qershori i vitit të kaluar dhe potencialisht mund të përballojë një pakësim deri në 70%.
FMN shtoi se në rast të një mbylljeje totale, e gjithë BE-ja mund të pësojë një rënie të prodhimit ekonomik prej gati 3% gjatë vitit të ardhshëm. Ai vë në dukje se ndërsa disa vende si Suedia, Danimarka dhe Greqia ka të ngjarë të kenë pak ose aspak ndikim në rritje, Italia, për shkak të varësisë së saj të lartë nga gazi në prodhimin e energjisë elektrike, mund të pësojë një rënie prej mbi 5%.
