Kryeministri i Kosovës, Albin Kurti, dha një deklaratë pas paralajmërimit të Emisarit Special të Bashkimit Evropian për dialogun Kosovë – Serbi, Miroslav Lajçak, se palët janë shumë afër arritjes së marrëveshjes për personat e pagjetur gjatë luftës së fundit.
Në një konferencë për media, kreu i qeverisë tha se është e nxituar të thuhet se janë afër arritjes së kësaj marrëveshje.
Ai bëri të ditur se janë disa çështje që kanë ngelur pa dakordësi dhe përmendi një dallim kryesor që tha se ekziston – emërtimi i personave të zhdukur gjatë luftës.
Sipas tij, Beogradi zyrtar insiston të quhen vetëm ‘persona të zhdukur’, ndërsa Kosova insiston në emërtimin ‘të zhdukur me dhunë’.
“Besoj se është pak çështje perceptimi se sa jemi afër ose larg. Nuk jemi shumë larg por ndoshta është e nxituar të themi se jemi shumë afër. Sidoqoftë janë disa çështje që kanë ngelur pa darkodim e unë do ta kisha theksuar një dallim kryesor që ekziston sa i përket emërtimit të personave të zhdukur gjatë luftës”.
“Beogradi zyrtar insiston të quhen vetëm persona të zhdukur ndërsa ne insistojmë të themi se janë të zhdukur me dhunë. Ata nuk janë zhdukur nga ndonjë fatkeqësi natyrore, por janë zhdukur me dhunë, pra bëhet fjalë për kidnapime, rrëmbime. Insistimi ynë është që të theksohet kjo gjë”, u shpreh kryeministri.
