Ministrja e Jashtme gjermane Annalena Baerbock e ka cilësuar një foto të përbashkët të bërë së fundmi të presidentit rus me atë turk Erdogan, një sfidë për NATO-n. Pamja është shkrepur gjatë një takimi mes liderëve rusë dhe turq në Iran.
Në foto shfaqen tre presidentët, me pritësin Ebrahim Raisi në mes, të kapur për dore dhe të buzëqeshur. Në një intervistë me Bild të publikuar të shtunën, Baerbock vuri në dukje se kjo foto është ‘më se e pakuptueshme’ për të, ‘veçanërisht nga këndvështrimi i një anëtari të NATO-s’.
Ndërsa është pjesë e aleancës, Turqia është shmangur nga vendet e tjera anëtare duke zgjedhur një qëndrim asnjanës në konfliktin e Ukrainës. NATO në tërësi zyrtarisht e konsideron Rusinë një kërcënim.
“Fakti që presidenti turk është në këtë foto është një sfidë, për ta thënë disi më butë.” – tha ajo.
Sipas mendimit të saj, fotografia dëshmon rëndësinë e të qenit së bashku ‘me partnerë me vlerë’, të cilët ‘jo vetëm që besojnë në rregullat ndërkombëtare, por edhe i mbrojnë ato’.
“Sepse ka aktorë të tjerë që nuk mbrojnë vlerat tona dhe kur janë në dyshim, ata gjithashtu bashkojnë forcat.” – shpjegoi ajo.
Bisedimet trepalëshe në kryeqytetin iranian u mbajtën në fillim të kësaj jave si pjesë e të ashtuquajturit Procesi i Paqes në Astana, i cili u nis nga Moska, Teherani dhe Ankaraja në vitin 2017 me synimin për të arritur një zgjidhje paqësore të konfliktit në Siri.
Putin zhvilloi gjithashtu bisedime dypalëshe me secilin nga homologët e tij. Situata në Ukrainë ishte në axhendën e të dy takimeve.
Ndërkohë, Turqia, së bashku me OKB-në, luajtën rolin e ndërmjetësit në ndërmjetësimin e marrëveshjes midis Rusisë dhe Ukrainës për të zhbllokuar eksportet e grurit nga portet ukrainase të Detit të Zi.
Marrëveshja, e quajtur nga Sekretari i Përgjithshëm i OKB-së Antonio Guterres si ‘një fener shprese, mundësie dhe lehtësimi’, u nënshkrua të premten në Stamboll, në prani të Erdoganit.
