Qeveria japoneze pritet të ndalojë presidentin rus Putin të marrë pjesë në funeralin shtetëror të ish-kryeministrit Shinzo Abe, nëse ai dëshiron ta bëjë këtë, njoftoi të premten agjencia e lajmeve Nikkei.
Abe, kryeministri më jetëgjatë i Japonisë, u vra në fillim të këtij muaji teksa po fliste para mbështetësve gjatë fushatës elektorale.
Gazeta Sankei Shimbun citoi një zyrtar të Ministrisë së Jashtme japoneze të thoshte se Tokio do të njoftonte zyrtarisht Rusinë, por ‘ne nuk presim që ata të vijnë’. Ceremonia do mbahet më 27 shtator.
Kremlini më parë tha se Putin nuk po planifikonte të merrte pjesë në funeral, ndërsa prania e zyrtarëve të tjerë do ‘varej nga protokolli’.
Japonia e futi në listën e zezë Putinin dhe disa zyrtarë të tjerë rusë, duke përfshirë ministrin e Jashtëm Sergej Lavrov, në fillim të marsit në përgjigje të operacionit ushtarak të Moskës në Ukrainë.
Rusia u përgjigj në të njëjtën mënyrë, duke sanksionuar një numër zyrtarësh të lartë japonezë, duke përfshirë kryeministrin Fumio Kishida dhe ministrin e Jashtëm Yoshimasa Hayashi.
Pasi shërbeu për një kohë të shkurtër si kryeministër në vitet 2000, Abe mbajti përsëri detyrën nga viti 2012 deri në vitin 2020, duke u bërë kryeministri më jetëgjatë i vendit. Ai u vra gjatë një aktiviteti të fushatës zgjedhore parlamentare në qytetin Nara më 8 korrik.
Abe u takua me Putinin më shumë se 25 herë gjatë punës së tij si kryeministër. Në letrën e tij të ngushëllimit, presidenti rus e përshkroi Abe-n si një udhëheqës ‘të shquar’, i cili ‘kishte bërë shumë për nxitjen e marrëdhënieve të fqinjësisë së mirë midis vendeve tona’.
