Kryeministri në largim i Mbretërisë së Bashkuar Boris Johnson zbuloi se në fillim të kësaj jave ai u bashkua me trupat ukrainase për një seancë stërvitore, stërvitjen e tij të dytë ushtarake në dy javë.
Të shtunën, Johnson postoi në Twitter një video që e tregonte atë në veshje kamuflazhi të plotë teksa testonte armë të ndryshme, duke përfshirë një raketëhedhës antitank dhe mitralozë. Ai shihet gjithashtu duke hedhur një granatë.
“Këtë javë vizitova trupat ukrainase që stërviten nga Forcat e Armatosura Britanike në North Yorkshire.” – tha kryeministri, duke shtuar në video se ai kishte takuar ‘disa nga 400 trupat ukrainase’ të cilët po stërviten nga forcat e Mbretërisë së Bashkuar si pjesë e një nisme ‘të madhe’. Programi, i cili u njoftua gjatë vizitës së Johnson në Kiev muajin e kaluar, parashikon stërvitjen e deri në 10,000 anëtarëve të shërbimit në muajt e ardhshëm.
Mbështetja ushtarake e Mbretërisë së Bashkuar për Ukrainën tashmë ka arritur në 2.3 miliardë paund (2.8 miliardë dollarë) dhe përfshin, tha Johnson, 6,900 armë antitank dhe 120 automjete të blinduara.
Moska ka paralajmëruar Perëndimin kundër dërgimit të armëve në Ukrainë, duke thënë se kjo vetëm do të zgjasë konfliktin.
Në video, Johnson bëri homazhe për ‘trimërinë dhe heroizmin’ e ushtarëve ukrainas, duke thirrur ‘Lavdi Ukrainës’ në gjuhën ukrainase për trupat.
