Këshilltari i Sigurisë Kombëtare i SHBA-së, Jake Sullivan, tha fundjavën e shkuar se Uashingtoni është i shqetësuar për sigurinë personale të presidentit ukrainas Vladimir Zelensky. Shtetet e Bashkuara po ndihmojnë Zelenskyn me sigurinë e tij, shtoi Sullivan.
“Siguria personale e Presidentit Zelensky është diçka që na shqetëson.” – tha Sullivan në Forumin e Sigurisë Aspen në Kolorado. “Ky është një lider në kohë lufte, që ka të bëjë me një armik në Rusi që është i pamëshirshëm, brutal dhe i aftë për çdo gjë.”
“Presidenti Zelensky merr masat paraprake që do të prisnit për të mbrojtur veten.” – vijoi Sullivan, duke shtuar se SHBA po ndihmon për të ‘lehtësuar’ sigurinë e liderit ukrainas, pa dhënë hollësi.
SHBA ofroi evakuimin e Zelensky nga Kievi kur Rusia nisi operacionin e saj ushtarak në Ukrainë në shkurt. Zelensky nuk e pranoi ofertën.
Këtë javë, parlamenti i Ukrainës miratoi shkarkimin e Ivan Bakanov, zyrtari më i lartë në shërbimin e sigurisë shtetërore (SBU). Zelensky gjithashtu hoqi drejtuesit e departamenteve të SBU në pesë nga rajonet e vendit. Bakanov ishte një bashkëpunëtor i ngushtë i Zelenskyt dhe dyshja kishin punuar së bashku që nga ditët e këtij të fundit në komedi.
Presidenti i Ukrainës ka pohuar në disa raste se atentatorët e kanë kërcënuar jetën e tij dhe zyrtarët e tij thanë shumë herë se Rusia synon të vrasë presidentin. Moska i mohon këto akuza, me zëdhënësin e Kremlinit Dmitry Peskov që deklaroi në prill se Zelensky ‘është presidenti i Ukrainës’ dhe Rusia dëshiron që ai të ulet dhe të pajtohet me kushtet e saj për paqen.
Projektligji i ndihmës ushtarake dhe ekonomike prej 40 miliardë dollarësh i nënshkruar nga presidenti i SHBA Joe Biden në maj shpërndan ‘burime të mjaftueshme për të mbajtur armët në qarkullim për disa kohë’, tha Sullivan, duke shtuar se edhe pse mbështetja publike për Ukrainën mund të jetë në rënie, ekziston një ‘rezervuar’ i ‘mbështetjes së thellë dhe të qëndrueshme’ në Shtëpinë e Bardhë dhe Kongresin amerikan.
Nëse mbarojnë dhjetëra miliarda dollarë, Sullivan tha se ‘do ketë mbështetje dypartiake në Kongres për të rifituar ato burime nëse do të jetë e nevojshme’.
