Bashkimi Evropian duhet të përgatitet për skenarin më të keq të një ndalimi të plotë të furnizimeve me gaz natyror nga Rusia, paralajmëroi presidentja e Komisionit Evropian në një intervistë me agjencinë gjermane të lajmeve DPA, të publikuar të hënën.
Kur u pyet për planin energjetik të KE-së të paraqitur javën e kaluar, Ursula Von Der Leyen theksoi rëndësinë e bërjes së bllokut të pavarur nga Rusia nga energjia, duke këmbëngulur se ishte vetëm çështje kohe përpara se Moska të vendoste të ndërpresë plotësisht dërgesat e gazit në BE.
“Kremlini nuk është një partner i besueshëm për furnizimin me energji të Evropës. Gazprom ka mbajtur qëllimisht nivelet e tij të ruajtjes të ulëta. Ndërkohë, Rusia furnizon gaz vetëm pjesërisht ose aspak në dymbëdhjetë shtete anëtare.”– tha Von Der Leyen, duke shtuar se ‘Evropa duhet të përgatitet për skenarin më të keq: një ndalim të plotë të furnizimeve me gaz, herët a vonë’.
Shefja e Komisionit vuri në dukje se BE-ja synon të jetë plotësisht e pavarur nga gazi rus më së voni deri në vitin 2027 dhe se rreth 300 miliardë euro do investohen sipas planit REPoëerEU, në mënyrë që të kursehet gazi dhe të përshpejtohet ‘kalimi në burimet e rinovueshme’.
Ajo vazhdoi të nxiste anëtarët e BE-së që nuk mbështeten shumë në importet e gazit rus që t’i bashkohen përpjekjeve për kursimin e energjisë. Presidentja e KE-së paralajmëroi se edhe nëse këto shtete mezi marrin gaz nga Moska, ato përsëri mund të preken rëndë në rast të ndalimit të plotë të dërgesave ruse të energjisë në BE.
Javën e kaluar, Komisioni Evropian prezantoi një plan urgjent energjetik të quajtur propozimi ‘Kurseni gazin për një dimër të sigurt’, i cili udhëzon të gjitha vendet e BE-së të ulin konsumin e tyre të gazit me 15% deri në shtator, një kufizim që është caktuar të zgjasë deri më 31 mars 2023.
Vendeve anëtare u kërkohet gjithashtu të kalojnë në energjinë e rinovueshme apo edhe qymyrin, naftën dhe energjinë bërthamore për të arritur këtë objektiv dhe të udhëzojnë qytetarët e tyre të racionojnë përdorimin e gazit.
Plani do të diskutohet nga ministrat e energjisë të BE të martën. Von Der Leyen shprehu besimin e saj se skema do të pranohet nga ministrat, të cilët ‘kuptojnë përgjegjësinë e tyre’ për të parë Evropën të sigurt gjatë dy dimrave të ardhshëm.
