Ukraina po kërkon të vendosë dënime të rënda për marrjen e nënshtetësisë ruse. Një projektligj që po shqyrtohet nga Kievi propozon gjoba dhe burgime të gjata, zbuloi të hënën zëvendësministri për Riintegrimin e Territoreve të Pushtuara Anatoli Stelmakh.
“Duke marrë parasysh legjislacionin mbi të cilin po punojmë, disa nga nenet e tij paraqesin dënime që variojnë nga një gjobë deri në 15 vjet burgim.” – tha Stelmakh në TV ukrainas.
Ideja e kriminalizimit të marrjes së nënshtetësisë ruse u mbështet nga zëvendëskryeministrja e Ukrainës dhe Ministrja për Riintegrimin e Territoreve të Pushtuara, Irina Vereschuk. Zyrtarja pranoi hapur se legjislacioni drejtohej më shumë nga motive politike sesa ligjore.
“Nga njëra anë, pasaporta ndihmon njerëzit e zakonshëm të mbijetojnë gjatë pushtimit. Nga ana tjetër, si mund t’ua shpjegojmë këtë qytetarëve tanë, të cilët luftojnë për vdekje në vijën e parë? Përfshirë faktin që pasaportat ruse nuk do të jenë kurrë në tokën tonë.” – tha ajo në një postim në Telegram të premten.
Në fillim të qershorit, presidenti rus Putin nënshkroi një dekret që u jep të gjithë ukrainasve të drejtën për të aplikuar për nënshtetësinë ruse sipas një procedure të thjeshtuar.
Duke vepruar kështu, ai zgjeroi procedurat e thjeshtuara që ishin zbatuar më parë për qytetarët e Republikave Popullore të Donetsk dhe Lugansk, si dhe banorët e rajoneve Kherson dhe Zaporozhye, të cilat kontrollohen kryesisht nga forcat ruse.
