Nuk ka asgjë në marrëveshjen e nënshkruar së fundmi për të zhbllokuar eksportet e grurit nga Ukraina që e ndalon Moskën të vazhdojë operacionin e saj special ushtarak, duke shkatërruar infrastrukturën ushtarake dhe objektiva të tjera ushtarake, tha të hënën ministri i Jashtëm rus Sergej Lavrov.
“Sipas marrëveshjes së grurit, Rusia nuk mori përsipër asnjë detyrim që do të pengonte vazhdimin e operacionit special ushtarak dhe shkatërrimin e infrastrukturës ushtarake.” – tha Lavrov, duke iu referuar sulmit raketor të kryer nga forcat ruse të shtunën në qytetin port të Odessa. .
“Terminali i grurit në Odessa ndodhet në një distancë të konsiderueshme nga objektet ushtarake.” – vuri në dukje kryediplomati, duke shtuar se Rusia nuk krijoi asnjë pengesë për eksportin e grurit.
Ai përmendi gjithashtu se, si rezultat i goditjes së Rusisë, sistemet kundër anijeve Harpoon të furnizuara nga SHBA të vendosura në qytet nuk përbënin më kërcënim për forcat ruse.
Të premten, përfaqësuesit e Rusisë, Ukrainës, OKB-së dhe Turqisë nënshkruan një marrëveshje për të zhbllokuar eksportet e drithit, ushqimit dhe plehrave kimike nga portet ukrainase. Marrëveshja përfshinte gjithashtu një memorandum që parashikonte përfshirjen e OKB-së në heqjen e sanksioneve ndërkombëtare për eksportin e grurit dhe plehrave ruse në tregjet botërore.
