Të paktën 60 persona janë plagosur pasi protestuesit sulmuan parlamentin irakian për herë të dytë brenda një jave.
Mbështetësit e klerikut Muqtada al-Sadr shkelën përsëri Zonën e Gjelbër të sigurisë së lartë në Bagdad, pasi kundërshtojnë emërimin e një kandidati rival pro-Iranit për kryeministër.
Blloku i Sadr fitoi shumicën e vendeve tetorin e kaluar, por nuk është në pushtet për shkak të një bllokimi politik.
Siç shkruan BBC, koalicioni më me ndikim në Parlament e ka dënuar protestën.
Korniza e Koordinimit të udhëhequr nga Shiitët u ka bërë thirrje irakenëve të organizojnë demonstrata “paqësore“, duke shtuar: “Shteti, organet e tij kushtetuese dhe paqja civile janë një vijë e kuqe.”
Gjashtë nga të plagosurit thuhet se janë në gjendje të rëndë.
Protestuesit janë zotuar të pushtojnë parlamentin deri në një njoftim të dytë, raporton agjencia e lajmeve AFP.
Ata fillimisht u mblodhën në fund të një ure që të çon në Zonën e Gjelbër – e cila është shtëpia e një numri ndërtesash më të rëndësishme të kryeqytetit, duke përfshirë ambasadat.
Por dhjetëra protestues i shkatërruan barrierat e betonit që mbronin zonën dhe vrapuan brenda parlamentit ku valëvitën flamujt irakianë dhe fotografitë e Sadr.
Protesta e kësaj të shtune pason një protestë të organizuar të mërkurën, kur qindra njerëz hynë në parlament.
