Vendimi për zbatimin e reciprocitetit për targat e letërnjoftimet e serbëve të Kosovës solli reagimin e këtyre të fundit të ndikuar edhe nga Beogradi zyrtar çka çoi në rritjen e tensioneve në veri të Kosovës.
Tensionet u shfaqën me vendosjen e barrikadave në dy vendkalimet kufitare në Jarinjë dhe Bërnjak.
Në Shqipëri opozita shqiptare reagoi menjëherë në mbështetje të Kosovës dhe institucioneve të saj dhe bëri thirrje për qetësim të situatës.
Ish-Presidenti i Republikës dhe njëherësh, drejtuesi i Partisë së Lirisë, Ilir Meta mbështeti hapur vendosjen e vullnetit të institucioneve të Republikës së Kosovës për ligjshmërinë në të gjithë territorin dhe dënoi sulmet ndaj Policisë.
“Mbështes plotësisht vullnetin e institucioneve të Republikës së Kosovës për vendosjen e ligjshmërisë në të gjithë territorin dhe dënoj me forcë çdo sulm ndaj Policisë dhe forcave të sigurisë në ushtrimin e misionit dhe detyrës së tyre ligjore dhe kushtetuese.
Bëj thirrje për shmangien e çdo provokimi dhe përshkallëzimi të tensioneve, që minojnë sigurinë e Kosovës, paqen dhe stabilitetin në rajon, duke theksuar se vendosja e reciprocitetit është e drejtë e çdo shteti sovran”-shkroi Meta.
Nga ana tjetër, ish-kryeministri Sali Berisha reagoi me një ton disi më të lartë duke sulmuar drejtpërdrejt Aleksandër Vuçiç.
Berisha e quajti Vuçiç serbomadh dhe Putinin e vogël të Ballkanit që sipas tij mobilizoi bandat serbe ditën e mbrëmëshme për të kundërshtuar reciprocitetin nga qeveria e Kosovës në përputhje me marrëveshjet e Brukselit.
Edhe Berisha doli pro reciprocitetit dhe mbështeti qeverinë e Kosovës dhe i bëri thirrje NATO-s të marrë masat dhe t’i jepte përgjigjen e merituar Vuçiçit.
“Bandat e Vuçiçit në verit të Kosovës bllokojnë rrugët dhe shkrehin breshëri armësh kundër policisë!
Miq, ashtu sikundër paralajmëroi, serbomadhi Vuçiç mobilizoi bandat serbe dhe të infiltruar nga Beogradi kundër aplikimit të reciprocitetit nga qeveria e Kosovës, në përputhje me marrëveshjet e Brukselit. Duke mbështetur qeverinë e Kosovës në qëndrimin e saj për vendosjen e reciprocitetit me Serbinë, dhe ligjit në tërë teritorin, dënoj me ashpërsinë më të madhe këto akte, si skenar ruso-serb, dmth Putin-Vuçiç, për të ndezur konfliktin në rajon. Nga ana tjetër, i bëjë thirrje NATO-s të marrë të gjitha masat për një përgjigje të merituar ndaj Putinit të vogël të Ballkani”-shkruante Berisha.
Por ndërkohë që opozita e Shqipërisë reagonte një zëri në mbështetje të qeverisë së Kosovës, Tirana zyrtare ka heshtuar dhe ende nuk ka reaguar.
As kryeministri Edi Rama i cili shpesh e quan Vuçiçin “vëllaun e tij” dhe as Ministria e Jashtme nuk reaguan për rritjen e tensioneve në veri të Kosovës.
Veprimet dhe kundërshtimet e Serbisë për zbatimin e marrëveshjeve dhe reciprocitetin në Kosovës nuk janë në një linjë me frymën që kërkon të përçojë Rama e Vuçiç me Ballkanin e Hapur, për hapjen e kufijve.
