Presidenti ukrainas Volodymyr Zelensky ka hapur derën për legalizimin e martesave të të njëjtit seks në vendin e tij, në përgjigje të një peticioni që e kërkonte këtë në vendin e shkatërruar nga lufta.
Në një përgjigje me shkrim në internet, Zelensky shpjegoi se do të ishte e pamundur të legalizoheshin martesat e të njëjtit seks ndërsa vendi është në luftë, sepse kjo do të kërkonte një ndryshim në kushtetutë.
Por ai tha se qeveria e tij kishte “përpunuar një zgjidhje në lidhje me legalizimin e partneritetit të regjistruar civil në Ukrainë, si pjesë e punës për vendosjen dhe garantimin e të drejtave dhe lirive të njeriut.”
Thirrja për të futur martesën e të njëjtit seks në vend është përshpejtuar nga lufta, për shkak të numrit të personave LGBTQ+ që shërbejnë në ushtri dhe mbrojtjeve më të mëdha ligjore që kanë civilët e martuar.
“Kodi i Familjes i Ukrainës përcakton se familja është njësia parësore dhe kryesore e shoqërisë. Një familje përbëhet nga persona që jetojnë së bashku, janë të lidhur nga jeta e përbashkët, kanë të drejta dhe detyrime të ndërsjella. Sipas Kushtetutës së Ukrainës, martesa bazohet me pëlqimin e lirë të një gruaje dhe një burri (neni 51).”– shkroi Zelensky në faqen e internetit të Presidencës ukrainase.
“Kushtetuta e Ukrainës nuk mund të ndryshohet gjatë një gjendjeje të gjendjes ushtarake ose të gjendjes së jashtëzakonshme (neni 157 i Kushtetutës së Ukrainës).”- shpjegoi ai sipas CNN.
Megjithatë, Zelensky tha se do të punonte me ministrat e tij për të “siguruar të drejtat dhe liritë” e të gjithë ukrainasve.
Ai falënderoi gjithashtu më shumë se 28 mijë njerëzit që nënshkruan peticionin për “qëndrimin e tyre aktiv qytetar“. Sipas ligjit të Ukrainës, Presidenti duhet të shqyrtojë peticionet që marrin më shumë se 25 mijë nënshkrime.
Në qershor, OKB-ja i identifikoi njerëzit LGBTQ+ si një grup të prekur në mënyrë specifike nga lufta dhe tha se refugjatët LGBTQ+ nga vendi “shpesh janë në rrezik të shtuar të përjashtimit, shfrytëzimit, dhunës dhe abuzimit dhe përballen me rreziqe të veçanta mbrojtjeje”.
Ukraina e legalizoi homoseksualitetin pas rënies së Bashkimit Sovjetik, por nuk ekziston asnjë njohje ligjore e marrëdhënieve të të njëjtit seks dhe çiftet e të njëjtit seks janë të ndaluar të birësojnë fëmijë.
