Forcat e Mbrojtjes së Izraelit (IDF) kanë publikuar pamjet video të një sulmi ajror që vrau komandantin e Xhihadit Islamik Palestinez Taysir al-Jabari në banesën e tij në Gaza të premten. Burimet palestineze thonë se tetë persona të tjerë u vranë dhe mbi 40 u plagosën në sulm.
Pamjet, të xhiruara me sa duket nga një dron vëzhgimi, kapën momentin kur një raketë izraelite u përplas në bllokun e apartamenteve, duke hapur një vrimë dykatëshe në ndërtesë dhe duke shkaktuar shpërthime në të paktën tre kate brenda.
IDF konfirmoi pak më vonë se sulmi vrau al-Jabarin, i cili mori detyrën si oficer komandues i Divizionit të Gazës të Xhihadit Islamik Palestinez (PIJ) pasi paraardhësi i tij, Baha Abu al-Ata, u vra në një sulm ajror izraelit në vitin 2019.
Nga dhjetë deri në 20 terroristë të PIJ-së u vunë në shënjestër gjithashtu në operacionin izraelit, tha IDF. Midis të vrarëve ishin anëtarë të një ‘skuadre terroriste’ të cilët ishin ‘gati për të kryer një sulm me raketa antitank dhe snajper’, pretendoi ushtria izraelite.
Një video e veçantë e lëshuar nga IDF menjëherë më pas tregoi një goditje në një post vëzhgimi të PIJ, me sa duket të kryer me artileri.
Zyrtarët palestinezë thanë se, përveç al-Jabarit, të paktën shtatë persona u vranë në sulme, duke përfshirë një vajzë pesëvjeçare dhe më shumë se 40 u plagosën.
Operacioni i së premtes erdhi pasi zyrtarët izraelitë paralajmëruan për ditë të tëra për një sulm të afërt të PIJ nga Gaza.
Organizata militante vendosi luftëtarët e saj në gatishmëri të lartë në fillim të kësaj jave pasi forcat izraelite arrestuan liderin e grupit në Bregun Perëndimor, Bassem Saadi, në qytetin e Jenin të hënën. Një adoleshent palestinez u vra në bastisjen në shtëpinë e Saadi, duke shkaktuar protesta në të gjithë territoret palestineze.
Në ditët para operacionit ‘Breaking Dawn’, Izraeli bllokoi rrugët brenda dhe jashtë Gazës. Ushtria shpalli gjithashtu një gjendje të jashtëzakonshme brenda 80 kilometrave (50 milje) nga kufijtë e saj me enklavën palestineze.
