Partia Demokratike ka dalë me një deklaratë për shtyp ku ka kërkuar marrjen e masave për rritjen e çmimeve dhe krizën ekonomike.
Dorjan Teliti nga selia blu tha se që nga 1 korriku nuk ka asnjë paketë mbështetëse në përgjigje të nevojës për të luftuar efektet e krizës.
PD-ja kërkon që të ndërhyhet në buxhetin e shtetit duke shkurtuar shpenzimet operative të domosdoshme, pezullimin e procedimit të prokurimeve publike si dhe ndërprerjen e pagesave për koncesionet dhe PPP-të.
Deklarata e plotë:
Të dashur qytetarë,
Kush më mirë se ju e ndjen krizën ekonomike që vazhdon të thellohet dita ditës?
Çmimet vazhdojnë të rriten, ata që marrin ushqime me listë shtohen çdo ditë, jetesa po bëhet gjithnjë e më e papërballueshme.
Sipas raportit të fundit të OKB, 1 në 3 shqiptarë jeton në pasiguri ushqimore.
Disa muaj më parë, qeveria ndërmori një paketë 3-mujore ndihmë. Fatkeqësisht ishte më e ulëta në rajon dhe asgjë më shumë se një “lemoshë” . Paketa prill-maj-qershor nuk i dha aspak përgjigje nevojës për të luftuar efektet e krizës.
Që nga 1 korriku paketë mbështetëse nuk ka më. Qeveria i ka braktisur të gjithë: qytetarët në nevojë, pensionistët dhe bizneset.
Ndaj, Partia Demokratike kërkon që të ndërhyhet menjëherë në buxhetin e vitit 2022:
-Të shkurtohen të gjitha shpenzimet operative jo të domosdoshme.
-Të pezullohen të gjitha procedurat e prokurimeve publike që s’kanë lidhje me rritjen e ekonomisë & mirëqenies, por vetëm për fryrjen e xhepave të një grushti njerëzish.
-Të ndërpriten një orë e më parë pagesat buxhetore për të gjitha PPP-të korruptive, për të cilat janë rreth 120 milionë euro të parashikuara për tu paguar gjatë vitit aktual.
Çdo lek i kursyer nga masat e mësipërme dhe çdo lekë shtesë që ka ardhur në arkën e shtetit si pasojë e rritjes së çmimeve, ti kthehen sa më shpejt qytetarëve dhe bizneseve nëpërmjet paketave mbështetëse.
Për kujtesë: vetëm gjatë periudhës janar-qershor 2022 janë mbledhur 22.7 miliardë lekë më shumë TVSH krahasuar me janar-qershor 2021.
Lekët janë dhe gjenden lehtësisht në buxhet, por duhet vullneti politik i qeverisë për të konkretizuar një orë e më parë një paketë të dytë serioze antikrizë, në vend të “lemoshës” së paketës së parë.
