Presidenti amerikan Joe Biden po nxit konfliktin në Ukrainë, i cili është një ‘krim i madh’, tha bashkëthemeluesi i ‘Pink Floyd’, Roger Waters në një intervistë të shtunën.
Waters e bëri deklaratën në një bisedë me gazetarin Michael Smerconish të CNN teksa diskutoi pikëpamjet politike të legjendës së rock-ut, të shfaqura edhe në turneun e tij të ri të koncertit ‘This Is Not A Drill’, i cili përmban një montazh të të dyshuarve ‘kriminelë lufte’ ku përfshihet një foto e Joe Biden me mbishkrimin ‘kriminel lufte’.
“Joe Biden po ndez zjarrin në Ukrainë si fillim. Ky është një krim i madh. Pse Shtetet e Bashkuara të Amerikës nuk e nxisin presidentin ukrainas Zelensky për të biseduar, duke shmangur nevojën për këtë luftë të tmerrshme, që po vret njerëz?” – pyeti ai.
Waters gjithashtu kundërshtoi argumentin e Smerconish se Ukraina ishte ‘pushtuar’ nga Rusia, duke vënë në dukje se e gjithë kriza duhet të analizohet në kontekstin historik.
“Duhet të shikoni historinë…Kjo luftë ka të bëjë kryesisht me veprimin dhe reagimin e NATO-s që shtyn deri në kufirin rus, gjë që ata premtuan se nuk do ta bënin.” – shtoi ai, duke kujtuar bisedimet e liderit sovjetik Mikhail Gorbachev me Perëndimin për tërheqjen e forcave të Moskës nga Evropa Lindore.
Waters tha se konflikti mbi Ukrainën filloi që në vitin 2008, një referencë e dukshme për samitin e NATO-s në Bukuresht, në të cilin u mbështetën synimet e Ukrainës dhe Gjeorgjisë për t’u bërë përfundimisht anëtarë të plotë të aleancës.
Intervista pa gjithashtu artistin e lindur në Angli të ‘Pink Floyd’ dhe Smerconish të përfshiheshin në një shkëmbim të nxehtë mbi rolin amerikan në Luftën e Dytë Botërore.
Waters këmbënguli se SHBA-të nuk mund ta quajnë veten ‘çlirimtare’, duke shtuar se Uashingtoni hyri në luftë vetëm për shkak të sulmit të Japonisë në Pearl Harbor në fund të vitit 1941. Gazetari i CNN, megjithatë, tha se SHBA-të do i bashkoheshin konfliktit pavarësisht kësaj.
Duke qëndruar në temën e Luftës së Dytë Botërore, muzikanti argumentoi se Bashkimi Sovjetik ‘pothuajse e kishte fituar luftën e përgjakshme’ në kohën kur SHBA-të hynë, duke shtuar se ‘23 milionë rusë vdiqën duke ju mbrojtur juve dhe mua nga kërcënimi nazist’.
Më parë, Waters e kishte dënuar operacionin rus, duke e quajtur atë ‘një gabim kriminal për mendimin tim, akt i një gangsteri’ dhe bëri thirrje për një armëpushim të menjëhershëm.
Në fund të vitit të kaluar, Rusia i bëri një propozim NATO-s dhe SHBA-së për të rënë dakord mbi garancitë e sigurisë sipas të cilave blloku do të përmbahej nga zgjerimi i mëtejshëm, me shtimin e mundshëm të Ukrainës që ishte një pikë veçanërisht e diskutueshme.
Në atë kohë, Moska këmbënguli gjithashtu në mosvendosjen e armëve sulmuese, duke përfshirë armët bërthamore, dhe kërkoi që forcat e NATO-s të tërhiqeshin në pozicionet që pushtuan në 1997.
Në mars, pas shpërthimit të armiqësive në Ukrainë, zëvendësministri i Jashtëm rus Sergej Ryabkov tha se garancitë e sigurisë të propozuara më parë nuk ishin më të vlefshme, duke përmendur ndryshimet drastike në peizazhin gjeopolitik.
