Forcat e Mbrojtjes së Izraelit (IDF) thanë të shtunën se janë të përgatitura për një ‘javë luftime’ pasi Izraeli filloi të godiste objektivat në Gaza një ditë më parë. Ata shtuan se për momentin nuk ka bisedime për paqe.
IDF tha se më shumë se 160 raketa janë hedhur në Izrael nga Gaza që nga pasditja e së premtes. Sistemi i mbrojtjes raketore Iron Dome shkatërroi 95% të raketave në ajër, tha Gjeneral Brigade Ran Kochav, zëdhënës i forcave të mbrojtjes.
Misioni, ‘Operacioni Breaking Dawn’, u nis në përgjigje të ‘kërcënimit të menjëhershëm të sulmit kundër civilëve izraelitë të paraqitur nga organizata terroriste e Xhihadit Islamik’, sipas IDF-së.
Kochav tha se ushtria izraelite goditi 40 objektiva, duke përfshirë ‘pesë platforma lëshimi raketash dhe gjashtë dyqane ose vende prodhimi raketash’, duke shtuar se komandanti i lartë i Xhihadit Islamik Palestinez (PIJ) Tayseer al-Jabari ishte në mesin e operativëve të vrarë.
“Shteti i Izraelit po punon për të mbrojtur qytetarët e tij dhe se ne do të operojmë me vendosmëri dhe saktësi sa më të madhe të jetë e mundur kundër operativëve terroristë dhe infrastrukturës.” – shkroi në Twitter ministri i Mbrojtjes Benny Gantz.
Brigada Al-Quds, krahu ushtarak i grupit të Xhihadit Islamik Palestinez, tha se hodhi 60 raketa në qytetet izraelite ‘në përgjigje të bombardimeve izraelite të Gazës’, siç citohet nga Al Jazeera.
Ministria palestineze e Shëndetësisë tha të shtunën se 12 civilë, përfshirë një vajzë pesëvjeçare, u vranë nga sulmet izraelite dhe 84 persona u plagosën. Një person u plagos nga prerjet e një rakete të lëshuar nga Gaza në jug të Izraelit, sipas Times of Israel.
