Agjentët federalë kanë sekuestruar telefonin celular të kongresmenit Scott Perry. Kështu tha përfaqësuesi republikan i Pensilvanisë në Kongres, i cili sulmoi agjencinë se po përdorte “taktika të republikës së bananeve” në mes të një hetimi për garën presidenciale të vitit 2020.
Perry tha të martën se “3 agjentë të FBI-së më vizituan dhe më morën celularin” ndërsa po udhëtonte me familjen.
“Ata nuk bënë asnjë përpjekje për të kontaktuar avokatin tim, i cili do të kishte marrë masa që ata ta kishin telefonin tim nëse kjo ishte dëshira e tyre.”- tha Perry, citon RT.
Ai tha: “Unë jam i indinjuar, megjithëse jo i befasuar që FBI nën drejtimin e Merrick DOJ e Garland, do të merrte telefonin e një anëtari të Kongresit në detyrë.”
FBI ekzekutoi një urdhër kërkimi kundër kongresmenit menjëherë pas bastisjes në resortin Mar-a-Lago të Donald Trumpit në Florida, kjo si pjesë e një hetimi për marrjen e dokumenteve të klasifikuara nga ish-presidenti pas largimit nga Shtëpia e Bardhë.
Ndërsa mbetet e paqartë nëse të dy hetimet janë të lidhura dhe FBI-ja ende nuk ka ofruar një arsye për urdhrin e kërkimit, ish-zyrtarë të lartë të Departamentit të Drejtësisë kanë dëshmuar se Perry ka luajtur “një rol të rëndësishëm” në përpjekjet për të vendosur aleatin e Trumpit, Jeffrey Clark si prokuror i përgjithshëm menjëherë pas garës së vitit 2020, me shpresën se ai do të mbështeste pretendimet e presidentit të atëhershëm për mashtrim masiv zgjedhor.
Sipas një burimi të cituar nga CNN, telefoni i Perry-t u sekuestrua nga agjentët federalë dhe iu kthye më vonë të martën, duke vënë në dukje se autoriteteve do t’u duhej një urdhër i dytë për të hyrë në përmbajtjen e pajisjes.
