Zbardhet kallëzimi i familjarëve të Ervis Martinajt në polici. Sipas “News 24”, kallëzimi është bërë nga xhaxhai i tij Faik Martinaj, i cili ka denoncuar se ka humbur kontaktet me nipin. Ai ka frikë se nipit mund t’i ketë ndodhur diçka e keqe për shkak të grupeve kriminale që kërkojnë ta eliminojnë.
“Në lidhje me nipin tim, djalin e vëllait Ervis Martinaj, i cili është shpallur ne kërkim nga Prokuroria e posaçme kundër krimit të Organizuar dhe Korrupsionit, dje (të martën) rreth orës 22:00, jemi njoftuar nga një i afërmi jonë, që për arsye sigurie nuk dua të përmend emrin, i cili nuk ndodhet në Shqipëri, por është nga Puka, se Ervisi është zhdukur dhe nuk kishte kontakte me të. Dua të theksoj se që prej kohës që nipi Ervisi është shpallur në kërkim nuk kam pasur asnjë kontakt me të drejtpërdrejt apo ne telefon, por vetëm nëpërmjet personave të afërm.
Ne si familje kemi dyshime se Ervisit mund t’i ketë ndodhur diçka e keqe nga grupe kriminale që kërkojnë ta eliminojnë. Ne kemi pritur deri ditën e sotme që mos kemi ndonjë kontakt me nipin Ervisin, por nuk kemi arritur të kontaktojmë dhe nuk kemi asnjë lloj informacioni për vendndodhjen edhe gjendjen e tij.
Sot në drekë (e mërkurë) rreth orës 12:00, të shqetësuar lidhur me gjendjen e nipit Ervisit, kam njoftuar punonjësin e policisë së komisariatit Kurbin P. T. për sa thashë me sipër.”- thuhet në kallëzimin e xhaxhait të Ervis Martinaj.
Policia e Shtetit ndodhet para një situate të komplikuar pasi Ervis Martinaj, është i shumëkërkuar nga drejtësia shqiptare. Dyshime ka se ky denoncim mund të jetë edhe një inskenim nga Martinaj për të humbur gjurmët. Por nga ana tjetër mund të ekzistojë rreziku që ai të jetë gjetur nga kundërshtarët e tij dhe të jetë ekzekutuar. Policia po shqyrton të gjitha pistat.
