Shtetet baltike dhe Polonia i janë lutur SHBA-së që të përshpejtojë dërgesat e armëve dhe të zgjerojë praninë e trupave amerikane në vendet e tyre, raportoi të shtunën Washington Post.
Sipas gazetës, operacioni ushtarak rus në Ukrainë ka bërë që Polonia, Estonia, Letonia dhe Lituania të kenë frikë se ‘do jenë të radhës që do sulmohen’.
“HIMARS, radarë kundër baterive raketore. Këto janë ato që do të na duhen më shumë për sa i përket fuqisë ushtarake që nevojitet urgjentisht për të penguar Rusinë.” – citohet të ketë thënë Kusti Salm, sekretari i Përgjithshëm i Ministrisë së Mbrojtjes të Estonisë.
Ministri letonez i Mbrojtjes Artis Pabriks u tha kohët e fundit gazetarëve, tha Ëashington Post, se Riga ka nevojë për mbështetje shtesë financiare për të blerë armë të reja dhe për të forcuar mbrojtjen e saj ajrore dhe bregdetare.
Zyrtarët polakë i kanë kërkuar gjithashtu SHBA-së të përshpejtojë dërgimin e armëve të premtuara Varshavës, sipas Post. Polonia është në pritje të baterive të raketave Patriot, HIMARS, avionëve luftarakë F-16 dhe tankeve Abrams, ‘gjatë planeve shumëvjeçare të përcaktuara përpara fillimit të sulmit rus në Ukrainë’, tha gazeta.
Ambasada polake në SHBA zbuloi më 4 gusht se ‘përpjekjet për të forcuar aftësitë mbrojtëse të vendeve që ndihmojnë Ukrainën në luftën e vazhdueshme’ ishin një temë kryesore e një takimi midis kreut të Byrosë së Sigurisë Kombëtare të Polonisë, Pawel Soloch dhe Këshilltari të Sigurisë Kombëtare të Biden, Jake Sullivan.
Shtetet e Bashkuara kanë thënë se janë të përkushtuara për bashkëpunimin e tyre të mbrojtjes me aleatët e NATO-s në Evropën Lindore. Paketa federale e shpenzimeve 2022 përfshinte autorizimin e parë prej 180 milionë dollarësh për Nismën e Sigurisë Baltike.
