Sipas Daily Mail, një e treta e materniteteve shtetërore të Anglisë kanë adoptuar terma të tillë si ‘njerëz që lindin’ ose ‘shtatzëna’, në vend të ‘nënës’ ose ‘gruas shtatzënë’. Një gjuhë e tillë nxitet nga organizata të fuqishme dhe me ndikim LGBTQ.
Gazeta britanike paraqiti kërkesat e Ligjit për Lirinë e Informacionit në 124 spitalet e NHS në Angli me njësi materniteti dhe zbuloi se 42 prej tyre e kanë adoptuar këtë gjuhë. Vetëm 29 ende përdorin ekskluzivisht fjalët ‘gratë’ ose ‘nënë’ për të folur për shtatzëninë.
Spitalet Universitare Epsom dhe St. Helier i thanë Daily Mail se ata kanë zëvendësuar fjalët ‘gratë’ dhe ‘nënat’, në një përpjekje për të ‘qenë sa më gjithëpërfshirës dhe përfaqësues sa të jetë e mundur’.
Spitale të tjera po e shmangin fjalën ‘grua’ në mënyra të ndryshme, me spitalet e Southampton që flasin për shtatzëninë në vetën e dytë, duke përdorur fjalë si ‘ti’ dhe ‘shtatzënia jote’ për të shmangur ‘grua’ ose ‘nënë’.
Udhëzimet zyrtare të NHS janë të paqarta. Ndërsa faqja e internetit e shërbimit shëndetësor përdor fjalën femra në shumicën e literaturës së saj të maternitetit, spitalet individuale kanë nxjerrë rregulla të ndërlikuara se kur dhe ku t’i shmangen ato.
Që në fillim të këtij viti, spitalet e NHS po pyesnin pacientët meshkuj nëse ishin shtatzënë përpara disa procedurave, pasi politika diktonte që kjo pyetje t’u bëhej të gjithë pacientëve, ‘pavarësisht se si mund ta identifikoni gjininë tuaj’.
Heqja e gjuhës gjinore është kundërshtuar ashpër nga disa organizata feministe, të cilat argumentojnë se gjuha transgjinore gërryen atë që do të thotë të jesh femër.
Megjithatë, ajo mbështetet nga disa prej organizatave më me ndikim LGBTQ në Mbretërinë e Bashkuar. Stonewall, i cili rendit vendet e punës në Britani sipas ‘të qenit miqësorë’ ndaj LGBTQ, këshillon punëdhënësit të përdorin gjuhë asnjanëse ndaj gjinisë.
Mermaids, një organizatë e përqendruar tek të rinjtë transgjinorë, ka lobuar tek qeveria britanike që të shtojë një gjuhë asnjanëse ndaj gjinisë në një projektligj për kompensimin e lehonisë.
Përgatiti për Hashtag.al, K.Manjani
