Tre armë automatike janë gjetur në një mjet të braktisur në rrugën Levan-Tepelenë që dyshohet se u përkasin autorëve të atentatit me dy viktima në Vlorë.
Ato janë gjetur brenda mjetit të djegur tip ‘BMW’ ndërsa viktimat e atentatit nuk janë identifikuar ende.
Ngjarja e rëndë ndodhi mëngjesin e sotëm te Mbikalimi i Panajasë në Vlorë ku ndaj një mjeti në lëvizje u qëllua me breshëri automatiku. Nga të shtënat mjeti doli jashtë rruge duke përfunduar në kanal.
Njoftimi
“Sot, rreth orës 09:50, në dalje të fshatit Panaja, në aksin rrugor Fier-Vlorë, në rrethana ende të pa qarta, dyshohet se janë vrarë me armë zjarri, dy shtetas ende të paidentifikuar, të cilët ndodhen brenda një automjeti tip “Benz”.
Gjatë krehjes së zonës, në fshatin Çerven, në aksin rrugor Levan-Tepelenë, nga shërbimet e Policisë është konstatuar duke u djegur një automjet i braktisur tip “BMW”, pa targa, i cili paraprakisht dyshohet se mund të jetë i autorit/ve të ngjarjes. Nga kqyrja paraprake e automjetit dallohen në brendësi të tij, 3 armë zjarri automatike.
Grupi hetimor nën drejtimin e Prokurorisë së Rrethit Gjyqësor Vlorë ndodhet në vendin e ngjarjes, ku vijon puna për zbardhjen dhe dokumentin e plotë të rrethanave të ngjarjes, identfikimin dhe kapjen e autorit/ve, si dhe identifikimin e dy shtetasve të gjendur pa shenja jete.
Shërbimet e Policisë së DVP Vlorë, Delta Forcës e FNSH-së, në bashkëpunim me DVP Fier kanë ngritur pika kontrolli dhe po krehin zonën për të bërë të mundur kapjen e autorëve.”
