Një komplot ndërkombëtar për të kontrabanduar 225 kilogramë ar me vlerë rreth 760 miliardë rubla (afërsisht 12.7 milionë dollarë) përmes Moskës u pengua nga agjentë doganorë, njoftoi të enjten Shërbimi Doganor Federal (FTS) i Rusisë.
Skema përfshinte dy grupe prej tre udhëtarësh që këmbyen valixhet brenda aeroportit Vnukovo. Grupi, i nisur për në Emiratet e Bashkuara Arabe, u kap me një numër shufrash ari në çantat e tyre.
Përpjekja për grabitje ndodhi më 11 gusht, tha FTS në një deklaratë. Sipas shërbimit doganor, tre shtetas armenë kontrabanduan arin në aeroport në bagazhet e tyre të dorës. Meqenëse Armenia është anëtare e Bashkimit Ekonomik Euroaziatik, ato nuk i nënshtrohen kontrolleve doganore.
Megjithatë, pasi hynë brenda, ata shkëmbyen valixhet me një treshe qytetarësh rusë, të cilët kishin hyrë me bagazhe bosh. Rusët ishin rrugës për në Dubai në Emiratet e Bashkuara Arabe.
Oficerët doganorë që mbikëqyrën kamerat e sigurisë së aeroportit, megjithatë, vunë re diçka të çuditshme. Tre pasagjerë tërhiqnin zvarrë valixhet e tyre me rrota me jo pak vështirësi. Ata filluan të ndiqnin treshen dhe i panë duke shkëmbyer çantat me burrat e tjerë.
Inspektorët doganorë vendosën të bëjnë një kontroll të pasagjerëve të nisur për në Emiratet e Bashkuara Arabe, të cilët tashmë kishin hipur në fluturimin e tyre.
“Kontrabandistët me ngarkesën e vlefshme u ndaluan nga oficerët e doganës së Vnukovo-s pasi hipën në aeroplanin e tyre.” – tha FTS.
Pasi hipën në bord dhe kontrolluan çantat e të dyshuarve, doganierët gjetën 45 shufra ari, tha FTS në raportin fillestar. Asnjë prej tyre nuk ishte deklaruar apo zhdoganuar në inspektim. Të gjithë kishin numrat serialë të përcaktuar me ligj dhe shenja të tjera identifikimi.
Gazeta ‘Kommersant’ më vonë raportoi se ngarkesa arrinte në 71 shufra ari – 14 shufra 12 kg secila dhe 57 shufra më të vogla, një kilogramëshe.
Një gjykatë në Moskë urdhëroi burgosjen e tre shtetasve armenë deri më 11 shtator. Ata u identifikuan si Artak Ayvazyan, Karen Darbinyan dhe Arman Harutyunyan, zyrtarisht të papunë.
Avokatët e tyre bënë një kërkesë për t’i mbajtur ata në arrest shtëpiak, por gjykata e hodhi poshtë. Shtetasit rusë u liruan në pritje të gjykimit pasi nënshkruan deklaratat se nuk do largoheshin nga Moska.
